Qazaqstan men Ispanııa birlesken kólik jobalaryn ilgeriletýge ýaǵdalasty
ASTANA. KAZINFORM — Qazaqstannyń Ispanııadaǵy elshisi Danat Musaev Ispanııanyń Kólik jónindegi memlekettik hatshysy Hose Antonıo Santanomen kezdesý ótkizdi, dep habarlaıdy QR SІM baspasóz qyzmeti.
Kelissózder barysynda taraptar kólik-tranzıt salasyndaǵy qazaq-ıspan yntymaqtastyǵynyń qazirgi jaı-kúıi men damý perspektıvalaryn talqylap, Transkaspıı halyqaralyq kólik baǵytyn (THKB) damytýǵa jáne Ortalyq Azııa men Eýropa arasyndaǵy ózara baılanystylyqty nyǵaıtýǵa erekshe nazar aýdardy.
Qazaq dıplomaty eldiń kólik-logıstıkalyq áleýetin damytý jáne ınfraqurylymdy jańǵyrtý baǵytynda atqarylyp jatqan jumystar týraly habardar etti. THKB búginde Eýrazııanyń kólik arhıtektýrasynyń mańyzdy elementteriniń birine aınalyp, Shyǵys pen Batys arasyndaǵy ornyqty ári ártaraptandyrylǵan saýda baǵyttaryn qamtamasyz etýge yqpal etip otyrǵany atap ótildi.
— Osy turǵyda THKB múmkindikterin Eýropalyq odaqtyń Global Gateway bastamasymen ushtastyrý jáne Ortalyq Azııa men Eýropalyq odaq arasyndaǵy ózara baılanystylyqtyń jańa tetikterin damytý máseleleri talqylandy. Atap aıtqanda, Memleket basshysy Qasym-Jomart Toqaevtyń Brıýsselge jasaǵan sapary aıasynda iske qosylǵan Ózara baılanystylyq kún tártibi platformasyna (Connectivity Agenda Platform) erekshe nazar aýdaryldy. Sondaı-aq logıstıka, kólik protsesterin tsıfrlandyrý jáne zamanaýı ınfraqurylymdy damytý salalaryndaǵy yntymaqtastyqty keńeıtý perspektıvalary qarastyryldy, — delingen habarlamada.
Suhbattasýshylar kólik jáne azamattyq avıatsııa salalaryndaǵy ózara is-qımyldy odan ári nyǵaıtý, sondaı-aq Halyqaralyq azamattyq avıatsııa uıymyn (IKAO) qosa alǵanda, beıindi kópjaqty alańdardaǵy ustanymdardy úılestirý máseleleri boıynsha pikir almasty.
Kezdesý qorytyndysy boıynsha taraptar birlesken jobalardy ilgeriletýge jáne kólik-logıstıkalyq saladaǵy yntymaqtastyqty odan ári damytýǵa ózara múddeliligin rastady.
Buǵan deıin Qasym-Jomart Toqaev Eýropalyq keńes Prezıdenti Antonıý Koshtamen beıresmı kezdesý ótkizgenin jazǵanbyz.
Sondaı-aq, Qasym-Jomart Toqaev Eýropalyq odaq basshylarymen Birlesken málimdeme qabyldaǵany habarlandy.
