Qazaqstan men Ispanııa arasyndaǵy taýar aınalymy 2 mlrd dollarǵa jetti
NUR-SULTAN. QazAqparat - Qazaqstan men Ispanııa elderiniń arasyndaǵy taýar aınalymy 2 mlrd dollarǵa jetti. Bul týraly búgin SІM-de ótken baspasóz máslıhatynda Qazaqstannyń Ispanııadaǵy jáne Andorradaǵy elshisi qyzmetin qosa atqarýshy Konstantın Jıgalov málim etti, dep habarlaıdy QazAqparat tilshisi.
«Biz ekijaqty baılanysty barynsha nyǵaıtý úshin ártúrli amal-ádisterdi qoldanýǵa tyrysamyz. Óz elinde birshama salmaqty ıspandyq ınvestordy Qazaqstanǵa tartý baǵytynda jumys júrgizilip jatyr. Bizdiń vedomstvoǵa ınvestıtsııa jáne eksport baǵytyndaǵy mindetter júktelgendikten, saýda-ekonomıkalyq qarym-qatynastyń qyr-syryn barynsha zerttep, túgendeýdemiz», - deıdi elshi.
Konstantın Jıgalov sonymen birge óz sózinde Qazaqstan naryǵynda tabysty jumys júrgizip jatqan ıspanııalyq kompanııalardy da atady.
«Qazirgi ýaqytta elimizde ıspandyq 66 zańdy tulǵa - fılıal, ókildik tirkelgen. Qarym-qatynas júıesin túgendeı kele, shynynda, naryǵymyzda ıspandyq iri 42 kompanııanyń baryn anyqtadyq. Onyń biri ózderińiz biletin - «Talgo». Onyń poıyzdarymen júrip júrgen bolarsyzdar. Jarylǵysh zat ázirleıtin MAXAM kompanııasynyń da Qazaqstanda 4 kásiporny bar. «Airbus» - jolaýshylarǵa arnalǵan ushaqtar men áskerı-kólik tehnıkalaryn shyǵarady. Qazaqstan qazirgi tańda «Airbus» kompanııasynyń eń iri úsh seriktesiniń biri. Biz qazirdiń ózinde 8 ushaq satyp aldyq. Taǵy da 3 ushaq alǵaly otyrmyz», - deıdi dıplomat.
Konstantın Jıgalovtyń aıtýynsha, osy jyldyń shilde aıynda Qazaqstan men Ispanııa arasyndaǵy strategııalyq seriktestik týraly kelisimge týra 10 jyl tolady.
