Qazaqstan men Irannyń taýar aınalymy 357 mln dollardan asty

ASTANA. KAZINFORM – 10-11 jeltoqsanda Astanaǵa Iran Islam Respýblıkasynyń Prezıdenti Masýd Pezeshkıan resmı saparmen keledi. Sapar barysynda joǵary deńgeıdegi qandaı kelissózder ótetinin jáne taraptardyń qazaq-parsy yntymaqtastyǵyn nyǵaıtý joldary týraly QR Syrtqy ister mınıstrliginiń resmı ókili Aıbek Smadııarov baıandady. 

Resmı ókildiń aıtýynsha, negizgi nazar saýda-ekonomıkalyq baılanystardy damytýǵa, kólik-logıstıkalyq ózara is-qımyldy keńeıtýge, sondaı-aq mádenı-gýmanıtarlyq almasýdy tereńdetýge bólinbek.

– Sapar Qazaqstan men Iran arasyndaǵy strategııalyq dıalogty arttyrýǵa jáne ekijaqty qatynastardy nyǵaıtýǵa baǵyttalǵan. Iran – Kaspıı jaǵalaýyndaǵy Qazaqstannyń jaqyn jáne tatý kórshileriniń biri, Orta Shyǵystaǵy senimdi ári mańyzdy seriktesteriniń biri. Iranmen tatý kórshilikti damytý – elimizdiń syrtqy saıasatynyń túıindi basymdyqtarynyń biri. Qazaqstan Irandy mańyzdy jáne senimdi seriktes retinde qarastyrady. Ekijaqty qatynas berik dostyqqa, ózara qurmetke jáne teń quqyqtylyqqa negizdelgen, – dedi Aıbek Smadııarov mınıstrlikte ótken aptalyq brıfıngide.

Sońǵy jyldary Qazaqstan men Iran arasyndaǵy seriktestik jańa mazmunmen, naqty nátıjege baǵyttalǵan jumyspen tolyǵyp keledi. Ekonomıka jáne ınvestıtsııa baǵyttarynda da úmit berer qarqyndy úrdister baıqalyp otyr.

– Byltyr eki el arasyndaǵy taýar aınalymy 340 mln AQSh dollaryna jetip, aldyńǵy jylmen salystyrǵanda 50 paıyzǵa artty. Osy jyldyń alǵashqy 10 aıynda saýda-sattyq kólemi 40 paıyzǵa ósip, 357 mln dollardan asty, – dedi A.Smadııarov.

Buǵan deıin mınıstrlik ókili Taıland pen Kambodja shekarasyndaǵy qarýly qaqtyǵystar kýrorttyq aımaqtardan alys jerde bolyp jatqanyn aıtqan edi.

Sondaı-aq, Prezıdenttiń Aýǵanstan jónindegi Arnaıy ókili Erkin Tuqymov Kabýlda jumys saparymen júr.

Al Eýropaǵa vıza rejımin jeńildetý boıynsha kelissózdiń ekinshi raýndy Astanada ótedi.