Qazaqstan men Iran týrıstik toptar úshin vızalyq rejımdi jeńildetedi
ASTANA. QazAqparat - 10-11 jeltoqsanda Tegeranda saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi Qazaqstan-Iran úkimetaralyq komıssııasynyń 15-otyrysy ótti, dep habarlaıdy QR Investıtsııalar jáne damý mınıstrliginiń baspasóz qyzmeti.
Otyrys aıasynda QR Investıtsııalar jáne damý mınıstrligi Týrızm ındýstrııasy departamentiniń dırektory Marat Iǵalıev Irannyń týrıstik bılik ókilderimen kelissózder júrgizdi. Taraptar jaqyn ýaqytta QR Investıtsııalar jáne damý mınıstrligi men Iran Islam Respýblıkasynyń mádenı mura, týrızm jáne qolóner uıymy arasynda ózara toptyq týrıstik saparlardy jeńildetý jónindegi memorandým ázirleýge kelisti.
Kelisim Qazaqstan men Iran azamattarynyń ózara toptyq týrıstik saparlary salasyndaǵy ózara tıimdi yntymaqtastyqty júzege asyrýǵa quqyqtyq jáne uıymdastyrýshylyq negiz qalyptastyrady. Qujat quramynda 5-ten 50-ge deıin adam bolatyn týrıstik toptar úshin vızalyq rejımdi jeńildetedi. Eki eldiń týrıstik bıligi Qazaqstan men Iranǵa baratyn týrıstik toptardy jasaqtaýǵa jaýapty jergilikti týroperatorlar tizimin almasatyn bolady.
Sondaı-aq, Qazaqstan-Iran úkimetaralyq komıssııasynyń otyrysy aıasynda Qazaqstan Respýblıkasy Úkimeti men Iran Islam Respýblıkasy Úkimeti arasyndaǵy iskerlik maqsattaǵy vızalardy rásimdeý tártibi týraly kelisimge qol qoıý máselesi de talqylandy.
QR Investıtsııalar jáne damý mınıstrligi Týrızm ındýstrııasy departamentiniń dırektory Marat Iǵalıev Iran Qazaqstannyń týrızm salasyndaǵy perspektıvaly seriktesi ekendigin atap óttti.
«Eki el arasyndaǵy týrıstik almasýlardy damytýda ózara toptyq týrıstik saparlardy jeńildetýdiń úlken mańyzy bar. Iran Qazaqstannyń týrızm salasyndaǵy perspektıvaly seriktesi bolyp tabylady. 80 mln-ǵa jýyq halqy bar. Bizdiń el ırandyq týrısterge ekologııalyq, oıyn-saýyq, mádenı-tarıhı týrızm múmkindikterin jáne basqa da demalys túrlerin usyna alady. Óz kezeginde Iran jańa týrızm strategııasyna sáıkes, 2025 jylǵa qaraı jyl saıyn 20 mln týrıst qabyldap, týrızmnen 30 mlrd dollar paıda tabýdy kózdep otyr. 2015 jyly Iranǵa 5,2 mln sheteldik týrıst kelgen. 2016 jyly Iran Qazaqstannan jáne taǵy 57 elden keletin demalýshylarǵa áýejaıda úsh aıǵa vıza berýdi bastady. Bul el saıahattyq týrızm múmkindikterin usynyp (Iranda ıÝNESKO-nyń mádenı mura tizimine engen 17 nysan bar), sonymen birge demalýshylardy qaýipsizdiktiń joǵary standarttarymen qamtamasyz etedi. Halyqaralyq sanktsııa alynǵaly alǵash ret Irannyń Iran Air áýekompanııasy Boeing kompanııasymen 80 ushaq satyp alý boıynsha kelisimge qol qoıdy. Jalpy aıtqanda, Iranmen týrıstik yntymaqtastyqtyń áleýeti úlken ekenin baıqap otyrmyz. Sondyqtan, birlesken jobalar men baǵdarlamalardy júzege asyrý, onyń ishinde Kaspıı teńizinde sý týrızmin damytý josparlanyp otyr», - dedi Marat Iǵalıev.
