Qazaqstan men Iran taýar aınalymyn jylyna 1 mln-nan 4 mln tonnaǵa deıin jetkizbek
Mundaı kelisimderge 2022 jylǵy 31 qazan men 1 qarasha aralyǵynda Iran Islam Respýblıkasyna eki kúndik jumys sapary kezinde QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın bastaǵan qazaqstandyq delegatsııasy qol jetkizdi.
Delegatsııa quramyna qazaqstandyq un óndirý, astyq jáne et odaqtarynyń, Qazaqstannyń agrarlyq jáne ónerkásiptik saıasatyn damytýǵa jaýapty memlekettik organdardyń, «QTJ» UK AQ, Azyq-túlik korporatsııasynyń ókilderi men basqa da múddeli qatysýshylary kirdi.
Qazaqstandyq agrarlyq jáne ónerkásiptik ónimder úshin jańa ótkizý naryqtaryna shyǵý múmkindikteri, qoldanystaǵy soltústik-ońtústik baǵytyndaǵy kedergilerdi joıý qazaqstan jáne ıranq taraptarynyń talqylaǵan negizgi taqyryptaryna aınaldy.
Serik Jumanǵarın ekijaqty kezdesýler kezinde atap ótkendeı, Qazaqstan men Iran arasynda ózara syılastyq, senimdi qarym-qatynas ornaǵan. Elder arasyndaǵy saýda-ekonomıkalyq áriptestikti ilgeriletýge 2022 jylǵy maýsym, qyrkúıek-qazan aılarynda ótken eń joǵary deńgeıdegi birqatar kezdesýler eleýli serpin berdi. Memleket basshylarynyń saparlarynyń qorytyndysy boıynsha birqatar ýaǵdalastyqtarǵa qol jetkizildi jáne Qazaqstan-Iran ózara is-qımylyn jandandyrýǵa baǵyttalǵan tapsyrmalar berildi.
- Búgin Qazaqstan bıdaı men arpany, kondıterlik jáne un ónimderin, et, ósimdik maılaryn jáne basqa da ónimderdi eksporttaýǵa daıyn, - dedi Serik Jumanǵarın Irannyń Aýyl sharýashylyǵy mınıstri Seıed Djavad Sadatınedjadpen kezdesýde.
– Biz Iranmen agroónerkásiptik ónimderdiń ózara saýda kólemin 1 mlrd dollarǵa deıin ulǵaıtýǵa jáne Qazaqstan úshin tıimdi Pákistan, Úndistan, Ońtústik-Shyǵys Azııa, Shyǵys Afrıka syndy jańa naryqtarǵa shyǵýǵa qyzyǵýshylyq tanytýdamyz. Irandyq áriptesterdiń saladaǵy tájirıbesi bizdiń bıznes úshin óte paıdaly bolary sózsiz.
Irannyń Kólik jáne qalany damytý mınıstri Rostam Qasemımen kezdesý barysynda Serik Jumanǵarın qazaqstandyq taraptyń taýarlar aǵynynyń kólemin jylyna 1 mln tonnadan 4 mln tonnaǵa deıin ulǵaıtý nıetin aıtty. Ol úshin kezdesýge qatysýshylar 2022 jyldyń sońyna deıin «tar» ınfraqurylymdyq oryndardy joıý jáne 2022-2025 jyldarǵa arnalǵan Soltústik-Ońtústik baǵytynyń áleýetin damytý boıynsha úshjaqty jol kartasyn qabyldaýǵa kelisti. Taraptar Jol kartasyna engizý úshin kelesi qadamdardy pysyqtaýǵa kelisti:
- júk kóliginiń júrgizýshileri, halyqaralyq tasymaldarǵa qatysýshylar úshin arnaıy vızalyq rejım qurý. Bıznes ókilderi úshin osyndaı vızalyq jeńildikter alý múmkindigin qosymsha qarastyrý;
- biryńǵaı tarıfti, biryńǵaı kólik qujatyn jáne biryńǵaı aqparattyq júıeni engizýdi qosa alǵanda, eki eldiń kedendik resimdeý protsesterin ońtaılandyrý;
- «Qyrǵyzstan – Qazaqstan – Reseı» úlgisi boıynsha navıgatsııalyq plombalardy paıdalana otyryp, «Qazaqstan – Túrikmenstan – Iran» baǵytynda júkterdi avtokólikpen tasymaldaý boıynsha pılottyq jobany iske qosý.
Sondaı-aq, logıstıkalyq protsester men ekijaqty saýdanyń tıimdiligin arttyrý maqsatynda taraptar birlesken eksporttyq-ımporttyq kompanııa qurý múmkindigin pysyqtaýǵa kelisti.
Kezdesýler barysynda aıtylǵandar saýda, kólik jáne logıstıkany damytý salasyndaǵy ózara is-qımyl jónindegi memorandýmǵa qol qoıýmen bekitildi.
Foto: gov.kz
