Qazaqstan men Iran Syrtqy ister mınıstrlikteri arasyndaǵy yntymaqtastyq baǵdarlamasyna qol qoıyldy

NUR-SULTAN. QazAqparat – Búgin elordada Qazaqstan men Iran Syrtqy ister mınıstrlikteri arasyndaǵy yntymaqtastyq baǵdarlamasyna qol qoıyldy. Qujat Iran Syrtqy ister mınıstri Mohammad Djavad Zarıftiń elimizge resmı sapary aıasynda rásimdeldi, dep habarlaıdy QazAqparat tilshisi.

«2020 jyly búkil Shyǵys álemine ortaq ataqty tulǵalarymyz ál-Farabı jáne Abaı jyldaryn belsendi atap óttik. Osy rette, dostas Iran jerinde olardyń murasyn nasıhattaý boıynsha kóptegen is-sharalar uıymdastyrýda kórsetken qoldaýy úshin ırandyq dostarymyzǵa shynaıy rızashylyǵymyzdy bildiremiz. Sondaı-aq, biz eki eldiń mádenıet, bilim-ǵylym salalaryndaǵy yntymaqtastyǵyn arttyrý ózektiligin ashyp kórsetip, kóne qoljazbalardy zertteý baǵytyndaǵy ekijaqty baılanystardy jandandyrýǵa, ǵalymdardyń saparlarymen almasýǵa, tarıhı jádigerlermen tanysýda ózara yqpaldastyqty jalǵastyrýǵa kelistik», - dedi Muhtar Tileýberdi Iran Syrtqy ister mınıstri Mohammad Djavad Zarıfpen kezdesýden keıin BAQ ókilderine arnalǵan málimdemesinde.

Onyń atap ótýinshe, búgingi kelisózder eki memleket arasyndaǵy qatynastardyń keleshegin aıqyndaý jáne halyqaralyq ahýal boıynsha pikir almasý turǵysynan óte paıdaly boldy.

«Kelissózder nátıjesi boıynsha Qazaqstan men Iran Syrtqy ister mınıstrlikteri arasyndaǵy yntymaqtastyq baǵdarlamasyna qol qoıdyq», - dedi QR Syrtqy ister mınıstri.