Qazaqstan men Iran saýda-sattyq kólemin arttyrýǵa kelisti
ASTANA. KAZINFORM — Iran — Qazaqstannyń saýda-ekonomıka salasyndaǵy óte mańyzdy seriktesi. Bul týraly Aqordada Iran Islam Respýblıkasynyń Prezıdenti Masýd Pezeshkıanmen kelissózder qorytyndysyna oraı BAQ ókilderine arnalǵan birlesken málimdeme barysynda Memleket basshysy Qasym-Jomart Toqaev aıtty.
— Biz parsy jurtyn ejelgi órkenıettiń zańdy murageri retinde jaqsy bilemiz. Elderińiz Taıaý Shyǵys pen Eýrazııany jalǵap tur. Sońǵy jyldary Irannyń áleýmettik-ekonomıkalyq jáne ǵylymı-tehnıkalyq áleýeti artyp keledi. Bul Sizdiń jáne Iran basshylyǵynyń qajyrly eńbegi men salıqaly saıasatynyń nátıjesi dep bilemiz. Qazaqstan Irannyń jetistikterine árdaıym qýanady, bolashaǵynyń jarqyn bolýyn tileıdi. Halyqtarymyzdyń yntymaǵyn bekemdeı túsý jáne tabystaryn eseleý — bizdiń ortaq maqsatymyz. Qazirgideı almaǵaıyp zamanda kúsh biriktirýdiń mańyzy zor ekeni sózsiz, — dedi Prezıdent.
Memleket basshysy búgingi tańda eki eldiń qarym-qatynasy qarqyndy damyp kele jatqanyn aıtty.
— Osy saparyńyzdyń nátıjesinde baılanystarymyz jańa deńgeıge kóteriledi dep senemin. Biz búgin shaǵyn jáne keńeıtilgen quramda nátıjeli kelissózder ótkizdik. Ózara yqpaldastyqqa tyń serpin beretin basym baǵyttardy talqyladyq. Qos tarap mańyzdy úkimetaralyq qujattarǵa qol qoıdy. Iran — Qazaqstannyń saýda-ekonomıka salasyndaǵy óte mańyzdy seriktesi. Osy oraıda ózara taýar aınalymyn ulǵaıtý máselesine basa nazar aýdardyq. Ótken 10 aıdaǵy saýda-sattyq kólemi byltyrmen salystyrǵanda 40 paıyzǵa arttyq. Aldaǵy ýaqytta bul kórsetkishti arttyra túsýge kelistik. Buǵan áleýetimiz tolyq jetedi, — dedi Qasym-Jomart Toqaev.
Buǵan deıin Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń Prezıdenti Masýd Pezeshkıandy qarsy alǵanyn jazǵan edik.
Qazirgi ýaqytta taraptar joǵary deńgeıdegi kelissózder júrgizip jatyr. Onyń barysynda saýda-ekonomıkalyq, kólik-logıstıka jáne mádenı-gýmanıtarlyq salalardaǵy qazaq-ıran yntymaqtastyǵyn odan ári nyǵaıtý máseleleri talqylanbaq.
Buǵan deıin Kazinform-nyń analıtıkalyq sholýshysy Astana men Tegeran arasyndaǵy kelissózdiń astaryna úńilip kórgen edi.