Qazaqstan men Iran saýda aınalymy ósti - Sheteldegi qazaq tildi BAQ-qa sholý
Qazaqstan OPEK+ kelisimi boıynsha munaı óndirý kólemin ulǵaıtady – «ÓzA»
Qazaqstan OPEK+ kelisimi boıynsha munaı óndirý kólemin ulǵaıtady.
El Energetıka mınıstrliginińhabarlaýynsha, OPEK+ kelisimine qatysýshy elderdiń jınyna Qazaqstannyń Energetıka vıtse-mınıstri Áset Maǵaýov qatysyp, otyrys barysynda mamyr aıynda elderdiń kelisim boıynsha mindettemelerin oryndaýy talqylanǵan.
Onlaın ótken otyrys qorytyndysy boıynsha OPEK+ elderiniń aǵymdaǵy óndirý deńgeıin tamyz aıyna táýligine 0,648 mln barrelge ulǵaıtýdy jalǵastyrý týraly sheshim qabyldanǵan bolyp, Qazaqstannyń tamyz aıyndaǵy mindettemeleri táýligine 1,706 mln barreldi quraıdy, delingen habarlamada.
Stılıst Aısulý Azamatqyzy qyzmetiniń qyr-syry jaıly aıtyp berdi - KAZNEWS
Qazaqstandyq stılıst Aısulý Azamatqyzy Baıan-Ólgıı aımaǵynda «Álem senimen ádemi» atty master klass ótkizdi. Sán álemindegi mártebeli mamandyqtyń ıesi –Aısulý Azamatqyzy qazirgi qyzmetiniń qyr-syry jaıly aıtyp berdi, dep habarlaıdy kaznews.
Stılıst Aısulý aldymen ózi jaıly jáne mamandyq tańdaý týraly oıyn bólisken.
Mońǵolııalyq BAQ-tyń dereginshe, Aısulý Azamatqyzy Baıan-Ólgıı aımaǵynda týyp óskenimen, 7 synypta ata-anasymen birge Qazaqstanǵa qonys aýdarǵan. Ál-Farabı atyndaǵy Qazaq ulttyq ýnıversıtetinde qazaq tili men ádebıeti mamandyǵyn bitirgen.
Onyń aıtýynsha, ádebıetke jaqyndyǵy arǵy teginen. Atasy Imashhan Baıbatyruly Mońǵolııa jáne Qazaqstan jazýshylar odaǵynyń múshesi, aqyn, jazýshy, dramatýrg bolǵan kisi eken. A. Azamatqyzy mamandyǵy boıynsha jumys jasamaǵan. Áý basta sol mamandyqpen nan tabamyn dep oqymaǵanyn tilge tıek etedi.
Aısulý Azamatqyzy turmys quryp, bala tárbıesimen 8 jyl úıde otyrǵan kezde shyǵarmashylyqqa beıimdiligi ony osy stılıstıka mamandyǵyna alyp kelgen.
Ol qazirgi ýaqytta Almaty qalasynda stılıst maman retinde jumys isteıdi.
Aısulý Azamatqyzy qyz-kelinshekterge sándi kıiný jóninde keńesti onlaın jáne offlaın beretinin aıtady.
Stılıst Aısulý sońynda qazirgi istep júrgen jumystary tilshiniń qoıǵan suraqtaryna jaýap bergen.
«Otandastar» qory men Túriksoı arasynda memorandýmǵa qol qoıyldy - TRT
Túriksoı Bas hatshysy Sultan Raev «Otandastar» qorynyń basshysy Abzal Saparbekulymen kezdesti. Túrkitildes elder arasynda yntymaqtastyq artyp keledi. Endi «Otandastar» qory men Túriksoı arasynda memorandýmǵa qol qoıyldy, dep habarlaıdy Túrkııa radıo teledıdar agenttigi.
Túrkııalyq BAQ-tyń dereginshe, Qazaqstannyń elordasynda «Otandastar» qory men Túrik mádenıetiniń halyqaralyq uıymy Túriksoı arasynda yntymaqtastyq jóninde memorandýmǵa qol qoıylǵan.
Atalǵan is-sharada Túriksoı Bas hatshysy Sultan Raev Qazaqstandaǵy sapary barysynda «Otandastar» qorynyń basshysy Abzal Saparbekulymen kezdesti.
Taraptar eki uıym arasyndaǵy ortaq jumystar men jaqyn bolashaqtaǵy jobalardy talqylady.
Túriksoı bas hatshysy Sultan Raevtyń pikirinshe, «Otandastar» qorymen Túriksoı arasynda yntymaqtastyq belsendi túrde jalǵasýda. Búgingi qol qoıylǵan memorandýmǵa sáıkes endi kelisim sheńberinde Túriksoı shetelderdegi qandastarmen baılanysty nyǵaıtpaq.
«Otandastar» qorynyń basshysy Abzal Saparbekulynyń aıtýynsha, «Otandastar» qory retinde endigi basymdyqty - shetelde ómir súretin qazaqtar jáne otandastarymyzdyń óz mádenıetin, ádet-ǵurpyn, tili men ónerin saqtap qalýy úshin qolymyzdaǵy múmkindikti berý. Halyqaralyq Túriksoı uıymynyń osy maqsatta qoldaý kórsetýi óte mańyzdy.
Aıta keteıik, atalǵan memorandýmda qazaq dıasporasymen baılanysty mádenı is-sharalar, jobalar men baǵdarlamalar jasaýǵa, óner festıvalderin, kórmeler, ulttyq meıramdardy birlese uıymdastyrý jóninde kelisimder bar.
«Sultan Raev Qazaqstandaǵy sapary barysynda aıyryqsha Qazaqstan parlamenti spıkeri Máýlen Áshimbaevpen de kezdesti. Áshimbaev Túriksoıdiń túrik álemi úshin óte mańyzdy eńbek atqarǵanyn atap kórsetti», dep jazady TRT.
Iran men Qazaqstannyń saýda aınalymy 29 paıyzǵa ósti – Parstoday
Iran Keden basqarmasynyń baspasóz ókili Rýholla Latıfıdyń aıtýynsha, Iran men Qazaqstan arasyndaǵy saýda aınalymynyń 29 paıyzǵa artqan, dep habarlaıdy Parstoday aqparattyq agenttigi.
Irandyq BAQ-tyń keltirgen málimetine súıensek, ótken jyly Iran men Qazaqstan arasynda quny 365 mln 200 myń dollar turatyn 729 myń tonnaǵa jýyq júk almasyldy. Bul tek jylmen salystyrǵanda salmaq boıynsha 71 paıyzǵa jáne ekonomıkalyq qun turǵysynan 29 paıyzǵa artqanyn kórsetedi.
Iran Keden basqarmasynyń baspasóz ókili R. Latıfıdyń pikirinshe, 729 myń tonnaǵa jýyq júktiń 187 mln 200 myń dollar turatyn 512 myń tonnadan astamyn Irannyń Qazaqstanǵa eksporty quraıdy. Ótken jylmen salystyrǵanda salmaq turǵysynan 51 paıyzǵa artty. Qazaqstannan Iranǵa quny 78 mln dollar turatyn 218 myń tonna taýar ımporttaldy. Ol ótken jylmen salystyrǵanda salmaq boıynsha 141 paıyzǵa, qun turǵysynan 108 paıyzǵa ósti.
Aıta keteıik, Irannyń Qazaqstanǵa jasalǵan eksporttyq taýarlary mal jáne egin sharýashylyǵy ónimderi, azyq-túlik, qurylys materıaldary, turmys zattary, munaı ónimderi, elektrondy jabdyqtar, ónerkásip tehnıkalary.
Galbadrah Otgontsetsegtiń izbasary Abıba Ábýjaqynova «Grand Slam» týrnırinde qola júlde aldy - Kaznews
Mońǵolııa astanasy Ulanbatyr qalasynda ótip jatqan dzıýdodan «Grand Slam» týrnırinde Qazaqstan quramasy 4 qola júldege ıe boldy.
Týrnırde 48 keli salmaqta synǵa túsken qazaqstandyq Abıba Ábýjaqynova Halyqaralyq dzıýdo federatsııasy atynan synǵa túsken Sabına Gılnııazovany jeńip, jarystyń qola júldesin aldy.
Bul týraly Mońǵolııanyń Kaznews aqparattyq portaly habarlady.
Bul salmaqta japon palýany Natsúmı Tsúnoda jeńimpaz atansa, mońǵolııalyq palýan Ganbaataryn Narantsetseg kúmis júldeni ıelendi. Sondaı-aq, ekinshi qola Ońtústik Koreıalyq Lı He-Kıýún enshisinde.
«48 keli salmaqta Qazaqstan abyroıyn buǵan deıin halyqaralyq jarystarda mońǵolııalyq legıoner Galbadrah Otgontsetseg qorǵap kelgen bolatyn. Abıba Ábýjaqynovaǵa keler bolsaq 48 keli salmaqta jasóspirimder arasyndaǵy álem chempıonatynyń kúmis júldegeri atanǵan. Onyń «Grand slam» jarystaryndaǵy alǵan alǵashqy júldesi Ulanbatyrdan buıyryp otyr. Al, Galbadrah Otgontsetseg 2021 jylǵy qarasha aıynan bastap sporttyq mansabyn aıaqtap, elge oralǵan. Galbadrah Otgontsetseg Qazaqstan komandasynyń namysyn abyroımen qorǵaǵan legıoner sportshylardyń biri bolǵan», dep jazady Mońǵolııalyq BAQ.
Aıta ketý kerek, Galbadrah Otgontsetsegtiń sporttyq ǵumyryndaǵy eń iri jeńis – 2016 jylǵy Rıo Olımpıadasynyń qola júldesi. 48 kelide Qazaq eliniń namysyn qorǵaǵan Galbadrah eki márte (2017, 2018) álem chempıonatynyń qola júldegeri atanyp, 2018 jyly Tashkentte ótken Azııa chempıonatynda top jarǵan bolatyn.
Qazaqstan-Shyńjań kásipkerleriniń onlaın birlesken tuńǵysh kezdesýi ótti – «Halyq gazeti»
29 maýsymda Qytaıdyń Shyńjań-Qazaqstan kásipkerleriniń onlaın birlesken tuńǵysh konferentsııasy ótti. Qytaı men Qazaqstannyń 120-dan astam kásiporyn ókilderi toqyma jáne tigin kıimderi, jeńil ónerkásip tehnologııasy, aýyl sharýashylyǵy ónimderi jáne basqa da salalardaǵy yntymaqtastyqqa basa nazar aýdardy.
Bul týraly osy aptada Qytaıdyń «Halyq gazeti» aqparattyq portaly habarlady.
Atalǵan BAQ-tyń dereginshe, Qytaıdyń Almatydaǵy Bas konsýldyǵynyń kommertsııalyq keńesshisi Lıýı Antsı Shyńjańnyń Qazaqstanmen ekonomıka men saýdany damytýda biregeı geografııalyq jáne mádenı artyqshylyqtarǵa ıe ekenin, «Bir beldeý, bir jol» jobasyn júrgizýde Qytaıdyń Shyńjań men Qazaqstan yntymaqtastyǵyn úzdiksiz tereńdetý kerektigin aıtty.
Shyńjań ólkelik Saýda departamenti dırektorynyń orynbasary Ron Tszıýn jıynda bıylǵy jyly Shyńjańnyń saýda basqarmasy Qazaqstanmen negizgi seriktes el retinde onlaın birlesken is-sharanyń alty serııasyn ótkizetinin jáne onlaın seriktesýdiń sapasy men tıimdiligin arttyrýǵa barynsha nazar aýdaratynyn aıtty.
«Kezdesýde Alashankou Jinmu Biotechnology Co., Ltd. jáne Shyǵys Qytaı ekonomıkalyq damý aımaǵy, Co., Ltd., Xinjiang Huayongze International Trade Co., Ltd. jáne Kazakhstan Kemac Asia Group Co., Ltd. sáıkesinshe Qazaqstannan 2000 tonna zyǵyr jáne 5000 tonna kúnbaǵys tuqymyn ımporttaý boıynsha yntymaqtastyq týraly hattamaǵa qol qoıdy», dep jazady qytaılyq BAQ.
Qazaqstannyń Ulttyq qorǵanys ýnıversıtetinde Irannyń alǵashqy jaýyngerlik óneri bólmesi ashyldy - Parstoday
Qazaqstannyń Ulttyq qorǵanys ýnıversıtetinde Irannyń alǵashqy jaýyngerlik óneri bólmesi ashyldy.
Bul týraly Irannyń Parstoday aqparattyq agenttigi habarlady.
Irandyq BAQ-tyń keltirgen deregine súıensek, IIR-nyń qorǵanys dıplomatııasynyń deńgeıin kóterý maqsatynda Irannyń Joǵary ulttyq qorǵanys ýnıversıteti Qazaqstan Ulttyq qorǵanys ýnıversıtetinde Qarýly kúshterdiń jaýyngerlik óneri bólmesin ashty.
IIR Soǵys óneri kabınetiniń ashylý saltanaty Qazaqstan respýblıkasynyń astanasy Nur-Sultan qalasynda Iran delegatsııasy músheleriniń jáne IIR-nyń osy eldegi birqatar áskerı bólimsheleriniń, sondaı-aq Qazaqstannyń joǵary laýazymdy áskerı basshylary men Ońtústik Koreıanyń Qazaqstandaǵy áskerı bólimsheleri ókilderiniń qatysýymen ótti. Aıta keteıik, Qazaqstannyń Ulttyq qorǵanys ýnıversıtetinde Iran soǵys óneri bólmesiniń qurylýyn Qazaqstannyń Ulttyq qorǵanys ýnıversıteti usynyp, Iran Qarýly kúshteriniń Bas shtaby maquldaǵan.
