Qazaqstan men Iran ózara toptyq týrıstik saparlardy jeńildetedi
Bul jaıynda QR Investıtsııalar jáne damý mınıstrligi Týrızm ındýstrııasy departamentiniń dırektory Marat Iǵalı málim etti, dep habarlaıdy QazAqparat.
«Iran Prezıdenti Hasan Rýhanıdiń Qazaqstanǵa resmı saparynyń qorytyndysynda qol qoıylǵan kelisim qazaqstandyq jáne ırandyq azamattardyń ózara toptyń týrıstik saparlary salasyndaǵy ózara tıimdi yntymaqtastyqty júzege asyrýǵa quqyqtyq jáne uıymdastyrýshylyq negiz qalaıdy. Qujat quramynda 5-ten 50-ge deıin adam bar týrıstik toptar úshin vızalyq rejimdi jeńildetedi. Vıza toptaǵy bir adamǵa ǵana beriledi. Eki eldiń týrıstik bıligi Qazaqstan men Iranǵa baratyn týrıstik toptardy qalyptastyrýǵa jaýapty jergilikti týrıstik operatorlardyń tizimimen almasady», - dedi ol.
Departament dırektorynyń atap ótýinshe, kelisimge barynsha qysqa merzimde qol qoıylǵan.
«Iran 80 mln. adam turatyn keleshegi zor kórshi naryq. El 30 jyldan astam ýaqyt boıy sanktsııa qursaýynda boldy jáne qazirgi ýaqytta ishki jáne syrtqy týrızmdi belsendi ilgerilete otyryp, álemge esigin aıqara ashyp otyr. Endi qol qoıylǵan kelisimdi júzege asyrý mańyzdy. Qazaqstandyq jáne ırandyq týrıstik operatorlar bul baǵytta belsendi ózara is-qımylǵa barady dep kútemiz», - dedi Iǵalı.
Aıta keteıik, 2017 jyly Astana-Tehran arasynda tikeleı áýe reısi ashylady.
