Qazaqstan men Iran kólik-logıstıkalyq termınal salý jónindegi kelisimge qol qoıdy
ASTANA.KAZINFORM - Qazaqstan men Iran Shahıd-Radjaı portynda qazaqstandyq kólik-logıstıkalyq termınal salý jónindegi BOT kelisimine qol qoıdy. Bul týraly Saýda jáne ıntegratsııa mınıstrligi habarlady.
Iran Islam Respýblıkasynyń Porttar jáne teńiz qatynasy uıymynda Shahıd-Radjaı portyndaǵy (Bender-Abbas qalasy) jer telimin qazaqstandyq kólik-logıstıkalyq termınal salý úshin berý jónindegi BOT (Build-Operate-Transfer – salý, paıdalaný jáne berý) kelisimine resmı qol qoıyldy.
Qazaqstan tarapy atynan kelisimge QR Saýda jáne ıntegratsııa mınıstrliginiń «QazTrade» saýda saıasatyn damytý ortalyǵy» AQ janyndaǵy QazExportPromotion korporatıvtik qorynyń bas dırektory Aman Malǵajdarov, Iran tarapynan Hormozgan provıntsııasy Porttar jáne teńiz qatynasy uıymynyń basshysy – «Shahıd-Radjaı porty» arnaıy ekonomıkalyq aımaǵynyń basshysy Hosseın Abbas Nejad qol qoıdy.
Kelisim 27 jyl merzimge jasaldy. Onyń ishinde 2 jyl termınal qurylysyn júrgizýge, al keıingi 25 jyl nysandy paıdalanýǵa arnalǵan. Al jobanyń úshinshi jylynda termınaldy kommertsııalyq paıdalanýǵa berý josparlanǵan.
Atalǵan jobanyń júzege asyrylýy Qazaqstan men Iran arasyndaǵy kólik-logıstıkalyq yntymaqtastyqty damytýdaǵy mańyzdy kezeń bolmaq.
Irannyń eń iri portynda Qazaqstan termınalynyń qurylýy «Soltústik – Ońtústik» halyqaralyq kólik dáliziniń tranzıttik áleýetin nyǵaıtýǵa, logıstıkalyq baǵyttardyń turaqtylyǵyn arttyrýǵa, sondaı-aq qazaqstandyq ónimniń Parsy shyǵanaǵy elderiniń, Ońtústik jáne Ońtústik-Shyǵys Azııanyń, sondaı-aq Shyǵys Afrıka naryqtaryna tıimdi shyǵýyn qamtamasyz etý arqyly eksport geografııasyn keńeıtýge múmkindik beredi.
Aıta keteıik, Atyraýda jylyna 3 mln jolaýshy qabyldaıtyn jańa termınal salynady.
