Qazaqstan men Iran halyqaralyq kólik dálizderin damytýǵa kelisti
ASTANA. KAZINFORM — Qazaqstannyń Irandaǵy elshisi Ońtalap Ońalbaev Iran Islam Respýblıkasynyń Jol jáne qala qurylysy mınıstri Farzane Sadegpen kezdesti, dep habarlaıdy QR SІM baspasóz qyzmeti.
Kezdesý barysynda áńgime eki eldi jalǵaıtyn kólik «arterııalaryn» damytý men ortaq múddelikti quraıtyn ózge taqyryptar tóńireginde órbidi. Bul rette taraptar Iran Prezıdenti Masýd Pezeshkıannyń Qazaqstanǵa resmı sapary barysynda qol jetkizilgen ýaǵdalastyqtardy jáne sapar qorytyndysy boıynsha eki el basshylary bergen tapsyrmalardy iske asyrý joldaryn talqylaýǵa erekshe kóńil bóldi.
— Qazaqstan men Iran qarym-qatynasynda saýda-ekonomıkalyq jáne kólik-logıstıkalyq baılanystylyq mańyzdy ról atqarady. Osyǵan baılanysty, taraptar «Soltústik-Ońtústik» halyqaralyq kólik dálizi men «Qazaqstan-Túrikmenstan-Iran» temir joly arqyly júk jáne tranzıttik tasymaldy ulǵaıtý, «Qazaqstan-Iran-Irak» jáne «Qazaqstan-Túrikmenstan-Iran-Armenııa» jańa kólik dálizderin ashý, eki el porttary arasynda keme qatynasyn damytý jáne Shahıd Radjaı men Chabahar porttarynda kólik-logıstıka boıynsha birlesken ınvestıtsııalyq jobalardy iske asyrý máselelerin zerdeleýge ázirligin bildirip, ekijaqty baılanysty jańa deńgeıge kóterýge beıildiligin rastady, — delingen mınıstrlik habarlamasynda.
Sonymen qatar, taraptar birlesken jobalardy iske asyrýdy ilgeriletý úshin eki eldiń kólik-logıstıka salasyna jaýapty tulǵalary arasynda turaqty kezdesýler ótkizýdiń mańyzdyǵyn atap ótti.
Qazaq dalasyn Iranmen sabaqtastyrý máseleleri birlesken úkimetaralyq komıssııanyń Iranda ótetin kezekti otyrysynda qarastyrylatyn bolady.
Buda buryn Iran prezıdenti Masýd Pezeshkıan Qazaqstan Eýrazııanyń mańyzdy torabyna aınalǵanyn aıtty.