Qazaqstan men Iran ekijaqty qatynastardy jan-jaqty nyǵaıtýǵa beıildiligin rastady
ASTANA. KAZINFORM – Iranǵa resmı sapary aıasynda Qazaqstan Respýblıkasy Premer-mınıstriniń orynbasary – Syrtqy ister mınıstri Murat Nurtileý Iran Islam Respýblıkasynyń Syrtqy ister mınıstri Seıed Abbas Arakchımen kelissózder ótkizdi.
Mınıstrler ekijaqty ózara is-qımyldyń qazirgi jaǵdaıy men damý perspektıvalaryn talqylady, sondaı-aq halyqaralyq jáne óńirlik kún tártibindegi ózekti máseleler boıynsha pikir almasty. Saýda-ekonomıkalyq seriktestikti tereńdetýge erekshe nazar aýdarylyp, yntymaqtastyqty sapaly jańa deńgeıge shyǵarý qajettiligi atalyp ótti.
– Biz eki el arasyndaǵy syndarly ári qarqyndy dıalogty keńeıtýdi jalǵastyramyz. 2024 jyly ekijaqty taýar aınalymy 12,3%-ǵa ósip, 340 mıllıon AQSh dollarynan asty. Al 2025 jyldyń birinshi toqsanynda bul kórsetkish 82%-ǵa artyp, 129 mıllıon dollardy qurady. Biz osy oń qarqyndy saqtap, ózara saýdany 3 mıllıard dollarǵa deıin ulǵaıtýdy kózdep otyrmyz, - dep málimdedi M.Nurtileý.
Qazaqstan jáne Iran syrtqy saıası vedomstvolarynyń basshylary Kaspıı óńirin damytý máseleleri boıynsha kúsh-jigerdi úılestirýdiń mańyzdylyǵyna nazar aýdardy. Sondaı-aq Qazaqstannyń shekara mańyndaǵy oblystary men Iran provıntsııalary arasyndaǵy yqpaldastyqty keńeıtý jáne eki eldiń Kaspıı porttarynyń áleýetin tolyq paıdalaný mańyzdy baǵyt retinde atalyp ótti.
Taraptar halyqaralyq alańdardaǵy ózara is-qımyldy oń baǵalap, atalǵan baǵyttar boıynsha jumysty jalǵastyrýǵa ýaǵdalasty.
Kelissózderdiń qorytyndysy boıynsha eki eldiń syrtqy ister mınıstrlikteri arasynda Yntymaqtastyq baǵdarlamasyna jáne Dıplomatııalyq arhıv salasyndaǵy ózara túsinistik týraly memorandýmǵa qol qoıyldy.
Sapar aıasynda Qazaqstan Syrtqy ister mınıstri IIR Joǵarǵy kóshbasshysynyń Halyqaralyq máseleler jónindegi keńesshisi Alı Akbar Velaıatımen kezdesý ótkizdi. Saıası, ekonomıkalyq jáne mádenı salalardaǵy baılanystardy nyǵaıtý talqylandy. Sondaı-aq óńirlik pen halyqaralyq uıymdar sheńberindegi yqpaldastyq jáne óńirlik turaqtylyq pen qaýipsizdikti qamtamasyz etý máselelerine erekshe kóńil bólindi.
Budan bólek M.Nurtileý Irannyń «Kaveh» kompanııasy dırektorlar keńesiniń tóraǵasy Mohammad Sadeg Kaveni qabyldady. Suhbat barysynda saýda-ekonomıkalyq baılanystardy keńeıtý, sonyń ishinde ónerkásip pen logıstıka salalaryndaǵy birlesken ınvestıtsııalyq jobalardy júzege asyrý perspektıvalary qaraldy. Qazaqstan men Iran arasyndaǵy taýar aınalymyn arttyrý jáne halyqaralyq kólik dálizderi aıasynda tranzıttik múmkindikterdi paıdalaný máseleleri de kún tártibinen tys qalǵan joq.