Qazaqstan men Iran arasyndaǵy taýar aınalymy tómendeı me
ASTANA. KAZINFORM – QR Premer-Mınıstriniń orynbasary – Ulttyq ekonomıka mınıstri Serik Jumanǵarın Qazaqstan men Iran arasyndaǵy taýar aınalymyna qatysty pikir aıtty.
- 2025 jyldyń qorytyndysy boıynsha Iranmen aradaǵy taýar aınalymy 450 mln AQSh dollary shamasynda boldy. Sol óńirdegi qaqtyǵys saldarynan bıyl taýar aınalym báseńdeıtini túsinikti. Atap aıtqanda, bul kórsetkishti 3 mlrd dollarǵa jetkizý mindeti qoıylǵan. Alaıda dál qazir osy maqsatty oryndaý qıynǵa túsedi, - dedi S.Jumanǵarın Parlament Májilisinde tilshiler suraǵyna jaýap bere otyryp.
Onyń aıtýynsha, Iranmen arada aýqymdy kelisimsharttar jasalǵanymen, Taıaý Shyǵystaǵy ahýalǵa baılanysty treıderlerdiń jumysynda irkilis baıqaldy.
- Sebebi tólem boıynsha táýekelder bar. Iranǵa qatysty aıtatyn bolsaq, buǵan deıin de tólem jasaý kezinde máseleler týyndady. Tólemder úshinshi elder arqyly júzege asyrylyp kelgen edi, - dedi Úkimet basshysynyń orynbasary.
Eske salsaq, Syrtqy ister mınıstriniń orynbasary Arman Isetov Iranmen aradaǵy birqatar jobalardy iske asyrý ýaqytsha toqtap qalǵanyn aıtty.
Buǵan deıin Irandaǵy soǵys Qazaqstannyń astyq eksportyna qalaı áser etip jatqanyn jazǵan edik.
