Qazaqstan men Iran arasyndaǵy yntymaqtastyqtyń bolashaǵy óte zor— Toqaev
ASTANA. KAZINFORM — Qazaqstan men Iran arasyndaǵy yntymaqtastyqtyń bolashaǵy óte zor. Bul týraly Aqordada Iran Islam Respýblıkasynyń Prezıdenti Masýd Pezeshkıanmen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
— Eki eldiń dıplomatııalyq qatynas ornatqanyna 33 jyldan asty. Osy kezeńde tyǵyz memleketaralyq yntymaqtastyqqa qol jetkizdik. Syndarly saıası dıalog qurdyq. Úkimetaralyq ekonomıkalyq komıssııa belsendi jumys atqardy. Parlamentaralyq baılanys jolǵa qoıyldy. Aýqymdy sharttyq-quqyqtyq negiz qalyptasty. 50-den astam kelisim jasaldy. Halyqaralyq uıymdar aıasynda yqpaldastyǵymyz jalǵasyp jatyr. Bul dástúrli dostyq pen áriptestigimizdiń aıqyn dáleli ekeni sózsiz, — dedi Memleket basshysy.
Prezıdent Irannyń halyqaralyq bedeli zor memleket ekenin atap ótti.
— Áleýmettik-ekonomıkalyq jáne ǵylymı-tehnıkalyq áleýeti kúsheıip keledi. Sizdiń jáne el basshylyǵynyń qajyrly eńbegi men salıqaly saıasatynyń arqasynda memleketterińiz eleýli tabystarǵa qol jetkizdi. Biz Irannyń órkendeı berýine tilektespiz. Elińizdiń joǵary kósemi, asa mártebeli aıatolla Álı Hameneıge meniń sálemimdi jetkizýdi suraımyn. Tegerandaǵy kezdesýimizdi jyly sezimmen eske alamyn, — dedi Qasym-Jomart Toqaev.
Memleket basshysy Qazaqstan men Iran arasyndaǵy yntymaqtastyqtyń bolashaǵy óte zor ekenin basa aıtty.
— Saýda-ekonomıka salasyndaǵy yqpaldastyqtyń orny erekshe. Ózara taýar aınalymy jyldan jylǵa artyp kele jatyr. Degenmen, saýda-sattyqty ártaraptandyrý máselesin oılastyrý kerek. Bul másele boıynsha jańa ǵana biz pikir almastyq. Ásirese, aýyl sharýashylyǵy, kólik-logıstıka, taý-ken, óndiris, medıtsına jáne ozyq tehnologııalar salasyndaǵy qarym-qatynasty jandandyrý qajet. Búgin qol qoıylatyn qujattar saıası jáne ekonomıkalyq alys-beristi damytýǵa tyń serpin beredi dep senemin, — dedi Prezıdent.
Budan buryn Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń Prezıdenti Masýd Pezeshkıandy qarsy alǵanyn jazǵan edik.
Premer-mınıstrdiń birinshi orynbasary Roman Sklıar Iran Islam Respýblıkasynyń Prezıdenti Masýd Pezeshkıannyń elimizge resmı saparyna oraı pikir bildirdi.