Qazaqstan men Iran Aqtaý porty arqyly júk tasymaly kólemin arttyrmaq
ASTANA. QazAqparat - Aqtaý teńiz portynyń ókilderi Qazaqstan men Iran arasyndaǵy teńiz jáne porttar yntymaqtastyǵy komıtetiniń májilisine qatysty. Bul týraly porttyń baspasóz qyzmeti habarlady dep jazady tumba.kz.
Qazaqstan men Iran arasyndaǵy teńiz jáne porttar yntymaqtastyǵy komıtetiniń 6-shy májilisi qarasha aıynyń basynda Iran Islam Respýblıkasynyń astanasy Tegeranda ótti.
Atalmysh jıynǵa baılanysty jarııalanǵan málimetterge qaraǵanda, Iran delegatsııasyn osy eldiń Halyqaralyq kelisimder men port uıymdary naryǵyn damytý jáne teńizde júzý departamentiniń bas dırektory Hosroý Saraı bastaǵan. Qazaqstan tarapyn «Aqtaý halyqaralyq teńiz saýda porty» UK» AQ-nyń prezıdenti Abaı Túrikpenbaev basqardy. Sharaǵa sonymen birge Aqtaý portynyń kommertsııalyq jáne ákimshilik máseleleri jónindegi basqarýshysy Martın Voetman qatysty.
Kezdesý barysynda Qazaqstan men Iran arasynda taýar aınalymy kólemin arttyrý máselesi sóz boldy. Naqtyraq aıtqanda onda eki eldiń porttarynyń arasynda qatynaıtyn turaqty konteıner qyzmetin jolǵa qoıý men ózara aqparat almasý máselesin jetildirý jaıy talqylandy. Buǵan qosa, Reseı, Qytaıdan Iranǵa taýar jetkizip, olardy parsy shyǵanaǵy elderi men Úndistanǵa aparý jáne ol jaqtan keri tasymaldaý máseleleri de pysyqtaldy»,-dedi porttyń baspasóz qyzmetindegiler.
