Qazaqstan men Irak sý resýrstary boıynsha memorandým jasaýǵa kelisti
ASTANA. KAZINFORM - Sý resýrstary jáne ırrıgatsııa birinshi vıtse-mınıstri Nurlan Aldamjarov Qazaqstan Respýblıkasyndaǵy Irak Respýblıkasy Elshiliginiń ýaqytsha senimdi ókili Djaber Ál-Temımımen kezdesti, dep habarlaıdy mınıstrliktiń baspasóz qyzmeti.
Kezdesýde taraptar Qazaqstan Respýblıkasy men Irak Respýblıkasy arasyndaǵy sý resýrstary salasyndaǵy ekijaqty yntymaqtastyq máselelerin talqylady.
Jıynda vıtse-mınıstr Irak Respýblıkasynyń arab óńirindegi Helsınkı sý konventsııasyna qosylǵan alǵashqy memleket bolǵanyn atap ótti. Qazaqstan da konventsııanyń qatysýshysy jáne Iraktaǵy áriptesterimen birlesip transshekaralyq sý yntymaqtastyǵynyń kún tártibin ilgeriletýge daıyn ekenin jetkizdi.
-Qazaqstan sý salasyndaǵy halyqaralyq kúsh-jigerdi jahandyq deńgeıde úılestirýdi kúsheıtýdi qoldaıdy jáne BUU júıesi aıasynda sý máseleleri jónindegi mamandandyrylǵan organ qurý bastamasyn ilgeriletip keledi. Áńgime halyqaralyq yntymaqtastyqty nyǵaıtý, derekter men tehnologııalar almasý úshin biryńǵaı úılestirý platformasyn qurý týraly bolyp otyr. Irakpen sý resýrstary salasyndaǵy yntymaqtastyq eki elge de paıdaly bolyp, ortaq sý máselelerin tıimdi sheshýge yqpal etedi dep senemiz, – dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.
Kezdesý qorytyndysynda taraptar Qazaqstan Respýblıkasy men Irak Respýblıkasy arasynda sý resýrstary salasyndaǵy ózara túsinistik týraly memorandým jasasýǵa daıyn ekenin bildirdi.
Osyǵan deıin Qazaqstan men Germanııa sý salasy boıynsha jańa jobalardy qarastyrǵany týraly jazdyq.
