Qazaqstan men Iordanııa sottalǵan adamdardy berý týraly kelisti

ASTANA. QazAqparat - Búgin  Aqordada elimizge resmı saparmen kelgen Iordanııa Hashımıt Koroldiginiń Koroli Abdalla ІІ ben ál-Hýseın men Elbasy Nursultan Nazarbaevtyń arasyndaǵy kelissózderden keıingi  birqatar qujatqa qol qoıyldy, dep habarlaıdy QazAqparat.

«Búgingi tańda qaterli qubylystarǵa aınalǵan terrorızm, dinı ekstremızm jáne qylmystyń basqa da túrlerine qarsy kúres júrgizý úshin eki eldiń qaýipsizdik qyzmetkerleri birlese jumys istep jatyr. Bul úshin biz uly mártebeli Korol myrzaǵa rahmet aıtamyz. Soǵan oraı búgingi sapar aıasynda birneshe  kelisimge qol qoıylǵanyna kýá boldyńyzdar», - dedi Qazaqstan Prezıdenti kelissózderden keıingi birlesken baspasóz málimdemesi barysynda.

Aıta keterligi,  Iordanııa Hashımıt Koroldiginiń Koroli Abdalla ІІ ben ál-Hýseınniń Qazaqstanǵa resmı sapary aıasynda birneshe qujatqa qol qoıylǵan bolatyn. Atap aıtqanda, QR Bas prokýrory Jaqyp Asanov pen Iordanııanyń syrtqy ister jáne ekspatrıanttar mınıstri Aıman as-Safadı Qazaqstan Respýblıkasy men Iordanııa Hashımıt Koroldigi arasynda Adamdardy ustap berý týraly, Sottalǵan adamdardy berý týraly jáne Qylmystyq ister boıynsha ózara kómek kórsetý týraly úsh kelisimdi rásimdedi. Munan bólek, QR Syrtqy ister mınıstri Qaırat Ábdirahmanov pen  Iordanııanyń syrtqy ister jáne ekspatrıanttar mınıstri Aıman as-Safadı Qazaqstan Respýblıkasy men Iordanııa Hashımıt Koroldigi arasyndaǵy Azamattyq qorǵanys, tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly, Terrorızmge, uıymdasqan qylmysqa, esirtki quraldarynyń, psıhotroptyq zattardyń, olardyń prekýrsorlarynyń zańsyz aınalymyna jáne qylmystyń ózge de túrlerine qarsy kúres salasyndaǵy yntymaqtastyq týraly kelisimderge  qol qoıdy.