Qazaqstan men Iordanııa yntymaqtastyqtyń negizgi baǵyttaryn aıqyndady
ASTANA. KAZINFORM — Amman qalasynda Qazaqstan Respýblıkasy men Iordanııa Hashımıttik Koroldigi arasynda saıası konsýltatsııalar ótti, dep habarlaıdy QR Syrtqy ister mınıstrliginiń baspasóz qyzmeti.
Kezdesý barysynda taraptar ekijaqty qatynastardyń qazirgi jaı-kúıi men damý perspektıvalaryn, sondaı-aq halyqaralyq jáne óńirlik kún tártibindegi ózekti máselelerdi talqylady.
Qazaqstandyq delegatsııany Qazaqstan Respýblıkasynyń Syrtqy ister mınıstriniń orynbasary Arman Isaǵalıev basqardy. Iordanııa tarapynan konsýltatsııalarǵa Iordanııa Syrtqy ister jáne ekspatrıanttar isteri jónindegi mınıstrliginiń Bas hatshysy Daıfalla Alı Ál-Faıez qatysty.
Kezdesýdiń basynda Iordanııa tarapy Qazaqstan Respýblıkasynyń Quryltaıyna alǵashqy saılaýdyń tabysty ótýimen quttyqtap, onyń elimizdiń odan ári saıası damýy úshin mańyzdy mánin atap ótti.
— Taraptar Qazaqstan-Iordanııa ózara is-qımylynyń oń dınamıkasyn atap ótip, saıası dıalogty odan ári nyǵaıtý jáne ekijaqty yntymaqtastyqty keńeıtý jónindegi is-júzindegi qadamdardy talqylady, — delingen habarlamada.
Saýda-ekonomıkalyq jáne ınvestıtsııalyq baılanystardy damytýǵa, aýyl sharýashylyǵy, kólik, týrızm jáne áýe qatynasy salalaryndaǵy ózara is-qımylǵa, sondaı-aq konsýldyq yntymaqtastyq pen sharttyq-quqyqtyq bazany jetildirýge erekshe nazar aýdaryldy.
Taraptar sondaı-aq BUU, IYU, AÓSShK, AQIU jáne basqa da halyqaralyq uıymdar sheńberindegi ózara is-qımyl máseleleri boıynsha pikir almasty. Halyqaralyq jáne óńirlik kún tártibindegi ózekti máseleler, onyń ishinde Taıaý Shyǵystaǵy ahýal jeke qaraldy.
Halyqaralyq gýmanıtarlyq quqyqty nyǵaıtý jónindegi jahandyq kúsh-jiger aıasynda taraptar 2026 jylǵy 7 jeltoqsanda Iordanııada ótetin joǵary deńgeıdegi «Soǵys kezindegi adamgershilik» (Humanity in War) konferentsııasyna daıyndyq máselelerin talqylady. Qazaqstan men Iordanııa birqatar basqa memleketpen qatar Halyqaralyq gýmanıtarlyq quqyqqa saıası mindettemeni kúsheıtý jónindegi jahandyq bastamanyń teń quryltaıshylary sanalady.
Sapar aıasynda Syrtqy ister mınıstriniń orynbasary sondaı-aq Koroldik saraı ókilimen kelissózder júrgizdi. Taraptar Qazaqstan Prezıdenti Qasym-Jomart Toqaevtyń 2025 jyly Ammanǵa jáne Iordanııa Koroli Abdalla II-niń Astanaǵa jasaǵan ózara saparlarynyń qorytyndylaryn shyǵardy. Joǵary deńgeıde qol jetkizilgen ýaǵdalastyqtardyń iske asyrylý barysyn, sondaı-aq eki el kóshbasshylary arasyndaǵy aldaǵy baılanystardyń perspektıvalaryn talqylady.
Kezdesýler qorytyndysy boıynsha taraptar Qazaqstan-Iordanııa saıası dıalogyn odan ári nyǵaıtýǵa jáne ekijaqty yntymaqtastyqqa barynsha praktıkalyq ári mazmundy sıpat berýge ózara múddelilikterin rastady.
Osyǵan deıin Iordanııadaǵy qazaqstandyq stýdentter saılaýǵa qatysýdyń mańyzy týraly aıtty.
