04:29, 04 Shilde 2024 | GMT +6
Qazaqstan men Indonezııa arasyndaǵy mádenı yntymaqtastyq perspektıvalary talqylandy
ASTANA. KAZINFORM — QR Mádenıet jáne aqparat Vıtse-mınıstri Erbol Áliqulov Indonezııa Bilim, mádenıet, zertteýler jáne tehnologııalar mınıstrliginiń Mádenıet basqarmasynyń bas dırektory Hılmar Farıdpen jáne Indonezııanyń QR-daǵy Elshisi Mohamad Fadjrýl Rahmanmen kezdesti. Erbol Áliqulov ótken jyly Qazaqstan men Indonezııanyń dıplomatııalyq qarym-qatynasyna 30 jyl tolǵanyn atap ótti.
«Osy ýaqyt ishinde bizdiń elderimiz ekijaqty ózara tıimdi yntymaqtastyq sheńberinde tyǵyz jáne senimdi qarym-qatynas ornatty. Qazir biz eki eldiń mádenı is-sharalarǵa qatysýy arqyly birlesken jumysty jandandyrýymyz qajet», – dedi QR Mádenıet jáne aqparat vıtse-mınıstri.
Qazaqstan men Indonezııa arasyndaǵy mádenı yntymaqtastyq týraly memorandýmǵa 2013 jyly qol qoıyldy. Seriktester ózara baılanys aıasyn keńeıtýge nıetti.
«Qazaqstan men Indonezııanyń ortaq tustary kóp. Biz – kópultty jáne kópmádenıetti memleketpiz. Bizdiń yntymaqtastyǵymyz odan da tıimdi ári jemisti bolatynyna senimdimin», – dep atap ótti Hılmar Farıd. Sonymen qatar eki elde de almasý boıynsha oqıtyn stýdentter sanyn kóbeıtýdi usyndy.
Jıyn sońynda qatysýshylar beıneleý jáne sándik-qoldanbaly óner, mýzyka, teatr jáne kınematografııa salasyndaǵy yntymaqtastyqty qarastyrýǵa jáne nyǵaıtýǵa daıyn ekendikterin atap ótti.
