Qazaqstan men Horvatııa ózara salyqtyq tártipti retke keltirdi
«Horvatııamen ózara saýda-sattyq týraly keıbir derekterdi qysqasha aıtyp ótkim keledi. Eki el arasyndaǵy taýar aınalymy sońǵy 10 jylda 1,4 mlrd AQSh dollaryna jetip otyr. Qazaqstan jáne Horvatııa arasyndaǵy ózara saýdanyń kólemi 2017 jyl ishinde edáýir ulǵaıyp, 317 mln AQSh dollaryn qurady, onyń ishinde eksport - 304 mln AQSh dollary, ımport - 13 mln AQSh dollary. Taýar aınalymnyń kóbeıýi Qazaqstannyń munaı ónimderin eksportqa kóptep shyǵarýyna baılanysty. Al 2016 jylǵy jalpy saýda aınalymy 38,5 mln AQSh dollaryn ǵana quraǵan bolatyn. Qazaqstandyq eksporttyń negizgi baǵyty munaı ónimderi, alıýmınıı bolyp otyr», - dep naqtylady QR Qarjy mınıstri Álıhan Smaıylov.
Sonymen qatar, Horvatııadan ımport qurylymynda farmatsevtik ónimder, kosmetıkalyq zattar, toqyma ónimderi basymdyqqa ıe.
Talqylaý barysynda palata depýtattary «Qazaqstan Úkimeti men Horvatııa Úkimeti arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly kelisimdi jáne oǵan Hattamany ratıfıkatsııalaý týraly» Zańyn qabyldady.
Kelisim Ekonomıkalyq yntymaqtastyq jáne damý uıymynyń modeldik tujyrymdamasynyń negizinde jasalǵan. Osyndaı halyqaralyq sharttar sheteldik ınvestorlarǵa kepildik berip, salyq salý quqyǵyn eki memleket arasynda ádiletti bólisýge múmkindik beredi. Atap aıtqanda, Kelisim birqatar maqsattardy kózdeıdi. Birinshiden, aldaǵy ýaqytta salyqtyń barlyq túrleri boıynsha aqparat almasýdy qalyptastyryp salyq qyzmetteri arasyndaǵy yntymaqtastyqty nyǵaıtý; ekinshiden, rezıdenttikti dáleldeıtin, eki memlekette birdeı qoldanylatyn tártipti belgileý; úshinshiden, dıvıdendter, paıyzdar, roıaltı sııaqty passıvti tabystarǵa shekti stavkalardy bekitý; tórtinshiden, eki eldiń quzyretti organdarynyń arasyndaǵy salyqtyq daýlardy sheshý úshin quqyqtyq negizin qalyptastyrý.
