Qazaqstan men Halyqaralyq Qaıta Qurý jáne Damý Banki arasyndaǵy kelisim maquldandy
ASTANA. 24 sáýir. QazAqparat - Búgin Parlament Májilisiniń jalpy otyrysynda «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy №7681-KZ Qaryz týraly kelisimge
(Ońtústik-Batys avtomobıl joldaryn damytý jobasy: Batys Eýropa-Batys Qytaı halyqaralyq tranzıt dálizi (OAÓEY 1b 6b)) túzetýlerge qatysty Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy kelisim hatty ratıfıkatsııalaý týraly» zań jobasy maquldandy.
Kelisim hatta «Shymkent-Jambyl oblysynyń shekarasy» jolynyń jańa ýchaskesin iske qosýǵa qatysty ózgerister engizilip otyr. Bul rette «Shymkent-Jambyl oblysynyń shekarasy» avtomobıl jolyn rekonstrýktsııalaý respýblıkalyq bıýdjetten qosa qarjylandyryla otyryp, HQQDB beretin únemdelgen qaryz qarajaty esebinen júzege asyrylatyn bolady.
Kólik jáne kommýnıkatsııa mınıstri Asqar Jumaǵalıevtyń aıtýynsha, Qyzylorda oblysyndaǵy osy joba aıasyndaǵy joldardy jóndeýde birshama qarajat únemdelgen.
Únemdelgen qarajattyń jalpy somasy 360,2 mln. dollardy, onyń ishinde HQQDB zaemy 360,1 mln. dollardy quraıtyn bolady. Respýblıkalyq bıýdjetten qaryzdy qosa qarjylandyrý 54,1 mln. dollardy quraıdy.
