Qazaqstan men Halyqaralyq elektrbaılanys odaǵy tsıfrlyq quzyretterdi damytýǵa kelisti
ASTANA. KAZINFORM — Dohada qol qoıylǵan qujattar qazaqstandyq jas mamandarǵa HEO-da jumys isteýge jol ashady, Afrıka elderiniń qatysýshylaryna 100 tegin oqý ornyn qarastyrady jáne Qazaqstanda HEO Akseleratsııa ortalyǵyn qurýǵa praktıkalyq serpin beredi.
Qazaqstannyń HEO kishi kásibı qyzmetkerler baǵdarlamasyna (Junior Professional Officers, JPO) qosylýy týraly kelisimge Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev pen HEO Bas hatshysy Dorın Bogdan-Martın qol qoıdy. Qazaqstan baǵdarlamany 0,6 jarna birligine balamaly úlespen qoldaýdy josparlap otyr. Atalǵan birlikterdi bólýge qazaqstandyq baılanys operatorlary járdem kórsetti.
Baǵdarlama qazaqstandyq jas mamandarǵa HEO-da praktıkalyq jumys tájirıbesin jınaqtaýǵa, halyqaralyq sarapshylarmen ózara is-qımyl jasaýǵa jáne uıymnyń bastamalaryna qatysýǵa múmkindik beredi. Alǵan bilimi men daǵdylaryn olar Qazaqstandaǵy tsıfrlyq jobalarda qoldana alady.
Ekinshi qujat Afrıka elderiniń qatysýshylaryna arnalǵan 100 tegin oqý ornyn qarastyrady. Oqý tsıfrlyq tehnologııalardy, baǵdarlamalaýdy jáne jasandy ıntellektini qamtıdy. Ol Astana Hub, alem.ai, Tech Orda, TUMO jáne Tomorrow School sııaqty qazaqstandyq bilim berý jáne tehnologııalyq bastamalardyń tájirıbesine súıene otyryp uıymdastyrylady.
Qujatqa Qazaqstannyń Jasandy ıntellekt jáne tsıfrlyq damý vıtse-mınıstri Dosjan Mýsalıev pen HEO Elektrbaılanysty damytý bıýrosynyń dırektory Kosmas Zavazava qol qoıdy.
Taǵy bir praktıkalyq qadam — HEO men TsARKA arasynda Qazaqstandaǵy HEO Akseleratsııa ortalyǵynyń modelin ázirleý jáne valıdatsııalaý jóninde jasalǵan hat-kelisim. Ortalyqty qurý týraly kelisimge Qazaqstannyń Jasandy ıntellekt jáne tsıfrlyq damý mınıstrligi men HEO 2026 jylǵy 5 shildede qol qoıǵan bolatyn. Ol jobanyń ınstıtýtsıonaldyq negizin qalady. Jańa hat-kelisim Ortalyqtyń dızaınyn ázirleýge nysanaly qarjylandyrý bólýdi kózdeıdi.
Jobada Mınıstrliktiń memlekettik jáne ınstıtýtsıonaldyq qoldaýy, HEO-nyń halyqaralyq ádisnamasy men jelisi, TsARKA-nyń saraptamalyq áleýeti men úlesi, sondaı-aq Astana Hub-tyń ekojúıelik róli biriktiriledi. Ortalyq HEO-nyń ITU Playbooks ádistemelik materıaldaryn paıdalanyp, negizgi tıimdilik kórsetkishteri boıynsha jumys isteıdi ári osy materıaldardy is júzinde qoldaný nátıjeleri boıynsha HEO-ǵa keri baılanys beredi. Bul jahandyq ádistemelerdi naqty mindetterge beıimdeýge jáne Qazaqstanda ǵana emes, Ortalyq Azııada da yntymaqtastyqty damytýǵa múmkindik beredi.
Bastama Qazaqstannyń halyqaralyq deńgeıde tsıfrlyq bilim men bilim berý múmkindikterin usynýshy el retindegi róli nyǵaıyp kele jatqanyn kórsetedi. El óz tehnologııalyq áleýetin damytyp qana qoımaı, jınaqtaǵan tájirıbesi men bilim berý sheshimderin sheteldik seriktesterimen bólisip, tsıfrlyq kadrlar daıarlaýǵa jáne jahandyq tsıfrlyq alshaqtyqty qysqartýǵa praktıkalyq úles qosyp otyr.
— Bul ýaǵdalastyqtar Qazaqstandaǵy kásibı múmkindikterdi damytýdy tájirıbemizdi seriktestermen bólisýge daıyndyǵymyzben ushtastyrady. Jas mamandar halyqaralyq praktıkalyq tájirıbe jınaqtaı alady, al Afrıka elderiniń qatysýshylary suranysqa ıe tsıfrlyq daǵdylardy oqyp-úırenýge múmkindik alady. Sondaı-aq biz Qazaqstan men óńirdiń qajettilikterin eskere otyryp, halyqaralyq tásilderdi qoldanýǵa kómektesetin Ortalyqty praktıkalyq turǵyda ázirleýge kóship jatyrmyz, — dedi Jaslan Mádıev.
Qazaqstan men HEO ýaǵdalastyqtardy júzege asyrýǵa kirisip, baǵdarlamalardy iske qosý boıynsha aldaǵy qadamdardy aıqyndaýdy josparlap otyr.
Aıta ketelik mınıstr Qazaqstan AI-ekonomıkanyń barlyq bes deńgeıin damytýdy kózdeıtini týraly aıtqan edi.
