Qazaqstan men Gýandýn provıntsııasy arasyndaǵy saýda bir jylda 37% ósti
ASTANA. KAZINFORM — Gýanchjoý qalasynda Qazaqstannyń Saýda-ekonomıkalyq mıssııasy ótti. Sharaǵa elimizdiń 20-dan astam kompanııasy qatysyp, Gýandýn provıntsııasynyń jetekshi bıznes ókilderimen kezdesti. Bul týraly Saýda jáne ıntegratsııa mınıstrliginiń baspasóz qyzmeti málim etti.
Forýmnyń ashylýynda Qazaqstan Respýblıkasynyń Saýda jáne ıntegratsııa mınıstri Arman Shaqqalıev eki el arasyndaǵy strategııalyq áriptestikti erekshe atap ótti. Onyń aıtýynsha, 2025 jyldyń alǵashqy jarty jyldyǵynda ekijaqty taýar aınalymy 15 mlrd AQSh dollaryna jetken. Bul ótken jylmen salystyrǵanda 5,9% -ǵa artyq .
Mınıstr Gýandýn provıntsııasynyń múmkindikterine de toqtaldy. JІÓ kólemi 1,9 trln dollar bolatyn óńirdiń Qazaqstanmen saýdasy byltyr 37,3%-ǵa ósken.
— Mıssııa aıasynda birneshe qujatqa qol qoıyldy. Solardyń ishinde «QazTrade» eksportty damytý ulttyq operatory men Guangdong Chamber of Commerce of Importers & Exporters arasyndaǵy yntymaqtastyq týraly kelisim bar. Kelissóz nátıjesinde qazaqstandyq raps maıy, qurama jem uny men arpany jalpy quny 45 mln dollar bolatyn kólemde jetkizý týraly naqty ýaǵdalastyq jasaldy. Buǵan qosa, qytaılyq kompanııalar qazaqstandyq qytyrlaq nanǵa, tabıǵı shyrynǵa jáne qurǵaq túıe sútine qyzyǵýshylyq bildirdi, — delingen habarlamada.
Forýmda tek saýda emes, kólik-tranzıt salasy da talqylandy. Búginde Qazaqstan basty tranzıttik dáliz retinde, Qytaıdan Eýropaǵa baratyn júkterdiń 80%-dan astamyn qabyldaıdy. «Bir beldeý, bir jol» bastamasy men Transkaspıı dálizi aıasynda 2030 jylǵa deıin Orta dáliz arqyly júk tasymalyn jylyna 10 mln tonnaǵa deıin jetkizý kózdelgen.
Investıtsııalyq baǵyt ta nazardan tys qalǵan joq. Táýelsizdik alǵannan beri Qazaqstanǵa 26,4 mlrd dollar kóleminde qytaılyq ınvestıtsııa tartylǵan. Qazirgi tańda quny 66 mlrd dollardan asatyn 224 birlesken ındýstrııalyq joba iske asyrylyp jatyr, onyń 67-si tolyq aıaqtalǵan. Bul ózara senim men uzaqmerzimdi seriktestiktiń aıqyn kórsetkishi.
Arman Shaqqalıev sózin qortyndylaı kele gýandýndyq kásipkerlerdi Qazaqstanda jańa jobalardy iske asyrýǵa shaqyrdy:
— Biz sheteldik seriktesterge tıimdi sharttar, salyqtyq jeńildikter men zamanaýı ınfraqurylym usyna alamyz. Qazaqstan Ortalyq Azııa, TMD, Taıaý Shyǵys pen Eýropa naryǵyna shyǵýdyń altyn kópiri bola alady, — dedi.
Mıssııa nátıjesinde taraptar saýda kólemin ulǵaıtýǵa, jańa birlesken bastamalardy júzege asyrýǵa jáne óńirlik yntymaqtastyqty tereńdetýge ýaǵdalasty. Gýanchjoýdaǵy bul kezdesý Qazaqstan men Qytaı arasyndaǵy strategııalyq seriktestikti damytýdyń mańyzdy kezeńi retinde baǵalandy.
Buǵan deıin habarlanǵandaı, bıyl Qazaqstan men Qytaı arasyndaǵy ekijaqty saýda aınalymy 21,8 mlrd dollarǵa jetken.