Qazaqstan men Grýzııanyń agroónerkásip ónimderi boıynsha ózara saýda kólemi 77 paıyzǵa ósken

ASTANA. KAZINFORM – Qazaqstan men Grýzııanyń aýyl sharýashylyǵy salasyndaǵy ózara is-qımyly turaqty oń serpin kórsetip keledi. Byltyr agroónerkásip ónimderiniń ózara saýda aınalymy 77 paıyzǵa ósip, 116 mıllıon dollardan asty.

Bul týraly Aýyl sharýashylyǵy mınıstri Aıdarbek Saparovtyń Qazaqstandaǵy Grýzııanyń Tótenshe jáne Ókiletti Elshisi Levan Dıasamıdzemen kezdesýi barysynda málim boldy.

Aıta keteıik, kezdesý barysynda taraptar agroónerkásip kesheni salasyndaǵy yntymaqtastyqtyń qazirgi jaı-kúıi men ony odan ári damytý múmkindikterin talqylady.

Aıdarbek Saparovtyń aıtýynsha, Qazaqstannan Grýzııaǵa negizinen bıdaı men meslın, aıran sarysýy, pııaz, shoshqa eti jáne basqa da aýyl sharýashylyǵy ónimderi eksporttalady.

Aıdarbek Saparov ózara saýda qurylymyn ártaraptandyrýǵa qyzyǵýshylyq zor ekenin atap ótti.

- Bizdiń el azyq-túlik ónimderin jetkizetin negizgi memleketterdiń biri retinde óz ornyn nyǵaıtyp keledi. Grýzııa naryǵyna astyq, un, ósimdik maılary, makaron ónimderi, shoshqa jáne qoı eti, sút ónimderi, kondıterlik ónimder jetkizýdi keńeıtýge múmkindigimiz bar. Eksport kólemin odan ári arttyrýǵa daıynbyz, – dedi mınıstr.

Óz kezeginde Levan Dıasamıdze de aýyl sharýashylyǵy salasyndaǵy yntymaqtastyqty keńeıtýge yntaly ekenin aıtty.

- Birlesken jobalardy damytý elderimiz arasyndaǵy saýda-ekonomıkalyq baılanystarǵa qosymsha serpin beretini sózsiz, – dedi elshi.

Eki eldiń veterınarııalyq qyzmetteri arasyndaǵy ózara is-qımyl da arta tústi.

Ótken jyldyń qańtar aıynda Qazaqstannan Grýzııaǵa asyl tuqymdy jáne sharýashylyq maqsatyndaǵy iri qara men usaq maldy, sondaı-aq soıýǵa arnalǵan maldy eksporttaýǵa arnalǵan veterınarııalyq sertıfıkattar kelisilip, rásimdeldi. Qazirgi ýaqytta tiri shoshqa men shoshqa etin eksporttaýǵa qoıylatyn veterınarııalyq-sanıtarııalyq talaptardy kelisý jumystary júrip jatyr.

Taraptar birlesken ınvestıtsııalyq jobalardy júzege asyrý máselelerin de nazardan tys qaldyrmady.

2023 jyldan bastap Qazaqstan aýmaǵynda QVM Technology, Ordabasy Group jáne «Ervıra» kompanııalary grýzııalyq Olive Georgia kompanııasymen birlesip záıtún aǵashtaryn tájirıbelik túrde otyrǵyzý jobasyn iske asyryp keledi. Túrkistan, Mańǵystaý oblystarynda jáne Jetisý oblysynda 6 myńnan astam kóshet otyrǵyzyldy. Alǵashqy ónim bes jyl ishinde alynady dep kútilip otyr.

2030 jylǵa qaraı «QVM Technology» kompanııasy Qazaqstanda záıtúndi óńdep, záıtún maıyn óndiretin zaýyt iske qosýdy josparlap otyr.

Kezdesý ıeleri yntymaqtastyqty odan ári nyǵaıtýǵa jáne birlesken jobalardy júzege asyrýǵa yntaly ekendikterin jetkizdi.

Osyǵan deıin Qazaqstan men Grýzııa týrızm jáne sport salasyndaǵy seriktestikti nyǵaıtatyny týraly jazdyq.