Qazaqstan men Grýzııa joǵary deńgeıdegi baılanystardy jandandyrýǵa kelisti
ASTANA. KAZINFORM — Memleket basshysy Grýzııa Premer-mınıstri Iraklıı Kobahıdzemen telefon arqyly sóılesti, dep habarlaıdy Aqordanyń baspasóz qyzmeti.
Grýzııa tarapynyń bastamasymen bolǵan áńgimelesý barysynda ózara qarym-qatynastyń qazirgi jaı-kúıi men damý perspektıvasy talqylandy.
— Qasym-Jomart Toqaev pen Iraklıı Kobahıdze ekijaqty jáne kópjaqty kún tártibindegi kóptegen másele boıynsha yntymaqtastyqty nyǵaıtýǵa beıil ekenin rastady. Kólik-tranzıt, energetıka jáne týrızm sekildi baǵyttarǵa basymdyq bere otyryp, saýda-ekonomıkalyq jáne ınvestıtsııalyq yqpaldastyqty keńeıtýdiń jaı-japsaryna aıryqsha nazar aýdaryldy. Qasym-Jomart Toqaev pen Iraklıı Kobahıdze halyqaralyq jáne óńirlik kún tártibindegi ózekti máseleler jóninde pikir almasty. Taraptar joǵary deńgeıdegi baılanystardy jandandyrýǵa kelisti, — delingen habarlamada.
Osydan buryn Prezıdent Japonııa Imperatorynyń týǵan kúnine oraı quttyqtaý jedelhatyn joldaǵanyn jazǵan edik.