Qazaqstan men Grýzııa jasandy ıntellekt salasyndaǵy áriptestikti kúsheıtpek
ASTANA. KAZINFORM — Qazaqstannyń Premer-mınıstri Oljas Bektenov Qazaqstanǵa resmı saparmen kelgen Grýzııa Premer-mınıstri Iraklıı Kobahıdzemen kezdesý ótkizdi. Bul týraly Úkimettiń baspasóz qyzmeti málim etti.
Onda saýda-ekonomıkalyq, ınvestıtsııalyq, kólik-logıstıkalyq, energetıkalyq yntymaqtastyq, sondaı-aq tsıfrlandyrý salasyndaǵy ózara is-qımyl máseleleri talqylandy. Qazaqstan Prezıdenti Qasym-Jomart Toqaev pen Grýzııa Premer-mınıstri Iraklıı Kobahıdzeniń arasynda qol jetkizilgen ýaǵdalastyqtardy júzege asyrýǵa nazar aýdaryldy.
— Sizdiń resmı saparyńyz eki el arasyndaǵy saıası dıalogtiń, ózara senim men berik áriptestiktiń joǵary deńgeıin aıǵaqtaı otyryp, Qazaqstan-Grýzııa qatynastarynyń serpindi damýyn kórsetedi. Keshe Siz Qazaqstan Respýblıkasynyń Prezıdenti Qasym-Jomart Toqaevpen mazmundy kelissózder júrgizdińiz. Qazaqstan Grýzııany Ońtústik Kavkazdaǵy, Qara teńiz aımaǵyndaǵy senimdi dos ári mańyzdy strategııalyq seriktes retinde qarastyrady. Qazaqstan Úkimeti Grýzııa Úkimetimen dıalog pen praktıkalyq yntymaqtastyqty odan ári tereńdetýge daıyn, — dep atap ótti Oljas Bektenov.
Grýzııa Premer-mınıstri Iraklıı Kobahıdze Qazaqstan Grýzııa úshin negizgi seriktes bolyp sanalatynyn aıtyp, ekijaqty yntymaqtastyqty odan ári keńeıtý úshin zor áleýettiń bar ekenin atap ótti.
— Elderimizdi tarıhı turǵydan dostyq qarym-qatynastar baılanystyrady. Bul — saıası jáne ekonomıkalyq baılanystardy nyǵaıtýdyń berik negizi. Qazaqstan Grýzııa úshin óte mańyzdy seriktes jáne bizdiń qarym-qatynasymyz biz úshin erekshe mańyzǵa ıe. Eki el arasynda strategııalyq seriktestik ornatylǵanyna qýanyshtymyz. Biz Qazaqstandaǵy jańǵyrtý úderisterin muqııat baqylap otyrmyz jáne barlyq baǵyt boıynsha ekijaqty yntymaqtastyqtyń odan ári keńeıe túsetinine senimdimiz» — dedi Iraklıı Kobahıdze.
Joǵary deńgeıde qol jetkizilgen ýaǵdalastyqtardy damytý maqsatynda taraptar ekonomıkanyń basym salalarynda birlesken jobalardy júzege asyrý jónindegi sharalardy talqylady. Tehnologııalyq áriptestikti talqylaý barysynda jasandy ıntellekt salasyndaǵy jobalarǵa erekshe nazar aýdaryldy.
Kelissózder qorytyndysy boıynsha Qazaqstan men Grýzııa úkimetteriniń strategııalyq áriptestikti odan ári nyǵaıtýǵa jáne barlyq keleshegi zor baǵyttar boıynsha praktıkalyq ózara is-qımyldy keńeıtýge ázirligi rastaldy.
2025 jyldyń qorytyndysy boıynsha Qazaqstan men Grýzııa arasyndaǵy ózara saýda kólemi $184,5 mln-dy qurady, al osy jyldyń qańtar-sáýir aılarynda — $53 mln. Búgingi tańda qazaqstandyq naryqta grýzın tarapynyń qatysýymen 600-den astam kompanııa jumys isteıdi, 14 uıym «Astana» halyqaralyq qarjy ortalyǵynyń alańynda tirkelgen.
Aıta keteıik, buǵan deıin Premer-mınıstr Oljas Bektenov pen Germanııanyń federaldy ekonomıka jáne energetıka mınıstri Katerına Raıhe ekonomıkalyq yntymaqtastyq máselelerin talqylady.
