Qazaqstan men Grýzııa yntymaqtastyq baǵdarlamasyna qol qoıdy
ASTANA. QazAqparat - Búgin elordada QR Syrtqy ister mınıstri Qaırat Ábdirahmanov pen Grýzııa vıtse premeri-Syrtqy ister mınıstri Mıhaıl Djanelıdze eki eldiń syrtqy vedomstvolary arasyndaǵy 2018-2019 jyldarǵa arnalǵan yntymaqtastyq baǵdarlamasyna qol qoıdy, de habarlaıdy QazAqparat tilshisi.
Qol qoıý rásiminen keıin sóz sóılegen QR Syrtqy ister mınıstri Grýzııa delegatsııasynyń erteń Astana ekonomıkalyq forýmyna qatysatynyn aıtty jáne kelissózderde kóterilgen máselelerge toqtaldy.
«Kelissózder barysynda saıası, saýda-ekonomıkalyq, mádenı-gýmanıtarlyq salalardaǵy yntymaqtastyqtyń jaı-kúıi men keleshegin talqyladyq. Sondaı-aq ózara múddelik týdyratyn halyqaralyq jáne óńirlik máseleler boıynsha pikir almastyq. Qazaqstan men Grýzııa táýelsizdikke qol jetkizip, álemdik qoǵamdastyqtyń tolyqqandy memleketteri men áriptesteri retinde qalyptasty. Byltyr eki memleket dıplomatııalyq qarym-qatynastyń 25 jyldyǵyn atap ótti. Osy kezeńde memleketterimizdiń arasyndaǵy ózara syılastyq senim men ashyqtyq qaǵıdattaryna negizdelgen dástúrli dostyq qarym-qatynastar sapaly nyǵaıa túsip kele jatyr», - dedi Qaırat Ábdirahmanov.
Onyń atap ótýinshe, búgingi tańda Qazaqstan men Grýzııa keń aýqymdy máseleler boıynsha tıimdi ózara yqpaldastyqtyń barlyq múmkindikterine ıe bolyp otyr. Eki memleket arasynda 70-ten astam qujattan turatyn aýqymdy sharttyq-quqyqtyq baza jasaldy.
«Qazaqstan úshin Grýzııa Ońtústik Kavkazdaǵy senimdi áriptes bolyp tabylady. Qazaqstan Grýzııamen dostyq pen yntymaqtastyqty nyǵaıtýǵa baǵyttalǵan. Memleketterimiz saýda-ekonomıka, ınvestıtsııa, aýyl sharýashylyǵy, týrızm jáne mádenı-gýmanıtarlyq salalarda úlken áleýetke ıe jáne ony damytýǵa nıet bildiremiz», - dedi mınıstr.
