Qazaqstan men Grýzııa Úkimetteri arasynda birqatar qujatqa qol qoıyldy
Kelissózder barysynda saýda-ekonomıkalyq ózara árekettestikti odan ári damytý máseleleri talqylandy. Saýda-ekonomıkalyq yntymaqtastyq jónindegi úkimetaralyq komıssııanyń onynshy otyrysynyń qorytyndylary qaraldy. 2018 jyly Qazaqstan men Grýzııa arasyndaǵy syrtqy saýda aınalymy 34,6% artyp, 100 mln dollarǵa jýyqty qurady.
Qos el Úkimetiniń basshylary ózara taýar aınalymyn odan ári arttyrýdyń qolda bar eleýli áleýetin atap ótti. Eldik ekonomıkalardyń qurylymy týrızm, aýyl sharýashylyǵy, ındýstrııalandyrý, kólik, energetıka salalaryndaǵy ózara tıimdi yntymaqtastyqtyń spektrlerin keńeıtýge múmkindik beredi.
Taraptar ekonomıkanyń jekelegen salalary jáne naqty ınvestıtsııalyq jobalar boıynsha taýar aınalymynyń kólemin ulǵaıtý jáne nomenklatýrasyn keńeıtýdi qamtamasyz etý jónindegi sheshimderdi qabyldaýǵa nıet bildirdi. Sonyń nátıjesinde ózara saýda-sattyq kólemderin qysqa merzimdi kezeńde eki ese ulǵaıtyp, 300 mln dollarǵa jetkizý kózdelgen.
Tranzıttik-kólik salasynda, onyń ishinde Transkaspıı halyqaralyq kólik baǵdaryn damytý aıasyndaǵy ózara is-qımyl máselelerine nazar aýdaryldy. Bul baǵyttaǵy tranzıttik tasymaldar 2015 jyldan bastap 2018 jylǵa deıin 13 eseden astamǵa artty. Bıyl 120 myń konteınerge deıin ulǵaıtý josparlanyp otyr.
Grýzııanyń Premer-Mınıstri Mamýka Bahtadze Qazaqstan men Grýzııanyń tarıhı jaqsy seriktester ekenin atap ótip, yntymaqtastyqty damytýdy tereńdetýge qyzyǵýshylyǵyn bildirdi.
Óz kezeginde QR Úkimetiniń basshysy Grýzııa Premer-Mınıstriniń sapary ózara tıimdi saýda-ekonomıkalyq yntymaqtastyqty odan ári damytýǵa eleýli serpin beretinin atap ótti.
«Bizdiń ortaq mindetimiz - kólemderdi ulǵaıtyp, elderdiń saýda salasyndaǵy ózara is-qımylyna jańa serpin bere alatyn jobalar men múmkindikterdi júzege asyrý», - dedi A. Mamın.
Úkimettik kelissózderdiń qorytyndysy boıynsha birqatar qujattarǵa qol qoıyldy:
1. Qazaqstan Respýblıkasy men Grýzııa arasyndaǵy 2019-2022 jyldarǵa arnalǵan ózara taýar aınalymynyń nomenklatýarsyn keńeıtý jónindegi jol kartasy;
2. QR Úkimeti men Grýzııa Úkimeti arasyndaǵy 2007 jylǵy 6 naýryzdaǵy Halyqaralyq avtomobıl qatynasy týraly kelisimge ózgerister men tolyqtyrýlar engizý týraly hattama;
3. QR Aýyl sharýashylyǵy mınıstrligi men Grýzııanyń Aýyl sharýashylyǵy mınıstrligi arasyndaǵy aýyl sharýashylyǵy salasyndaǵy yntymaqtastyq jónindegi ózara túsinistik týraly memorandým;
4. QR Eńbek jáne halyqty áleýmettik qorǵaý mınıstrligi men Grýzııanyń Eńbek, densaýlyq saqtaý jáne áleýmettik qorǵaý mınıstrligi arasyndaǵy áleýmettik-eńbek salasyndaǵy yntymaqtastyq týraly memorandým.
