Qazaqstan men Grýzııa týrızm jáne sport salasyndaǵy seriktestikti nyǵaıtady
ASTANA. KAZINFORM – QR Týrızm jáne sport mınıstri Erbol Myrzabosynov elordada Grýzııanyń Qazaqstan Respýblıkasyndaǵy Tótenshe jáne Ókiletti Elshisi Levan Dıasamıdze myrzamen kezdesti. Bul týraly Týrızm jáne sport mınıstrliginiń baspasóz qyzmeti habarlady.
Kezdesý barysynda taraptar týrızm jáne sport salalaryndaǵy ekijaqty yntymaqtastyqty damytý máselelerin jan-jaqty talqylady.
Mınıstr týrızm salasy eki el arasyndaǵy seriktestiktiń serpindi ári basym baǵyttarynyń biri ekenin atap ótti. Keıingi jyldary Grýzııa otandyq týrıster úshin tanymal baǵyttardyń birine aınaldy. Qazaqstan da grýzııalyq saıahatshylar arasynda negizgi baǵyttardyń biri sanalady. Elimiz sheteldik qonaqtarǵa mádenı-tanymdyq, etnografııalyq, ekologııalyq jáne iskerlik týrızm baǵyttary boıynsha keń múmkindikter usynady.
– Eki el arasyndaǵy týrıstik aǵynnyń artýyna áýe qatynasynyń damýy aıtarlyqtaı yqpal etýde. Týrıstik maýsym kezinde Qazaqstan qalalary men Grýzııanyń Tbılısı, Batýmı jáne Kýtaısı qalalary arasynda shamamen 40 tikeleı áýe reısi júzege asyrylady. Sonymen qatar eki el arasyndaǵy vızasyz rejım de týrıster úshin qolaıly jaǵdaı jasap otyr, - dedi Erbol Myrzabosynov.
Basqosýda taraptar sport salasyndaǵy yntymaqtastyqtyń da berik ári tarıhı negizi bar ekenin atap ótti. Búginde Qazaqstan men Grýzııa arasynda sportshylar men jattyqtyrýshylardyń tájirıbe almasýy, birlesken oqý-jattyǵý jıyndaryn uıymdastyrý, sondaı-aq halyqaralyq jarystarǵa qatysý baǵytyndaǵy jumystar júıeli túrde júzege asyrylyp keledi.
Sondaı-aq Grýzııa sportshylary Qazaqstanda ótetin iri halyqaralyq sporttyq is-sharalarǵa belsendi túrde qatysyp júr. Olardyń qatarynda Astanada ótken 5-shi Dúnıejúzilik kóshpendiler oıyndary, dzıýdodan reıtıngtik týrnırler, mánerlep syrǵanaýdan halyqaralyq jarystar jáne ózge de bedeldi básekeler bar.
Eki el ókilderi aldaǵy ýaqytta birlesken jarystar uıymdastyrý, oqý-jattyǵý jıyndaryn ótkizý, sondaı-aq jattyqtyrýshylar men sport salasyndaǵy mamandar arasynda tájirıbe almasý baǵytyndaǵy yntymaqtastyqty odan ári damytýǵa daıyn ekenderin jetkizdi.
Budan buryn Týrzım jáne sport mınıstri Erbol Myrzabosynov Úkimet otyrysynan keıin ótken baspasóz máslıhatynda qysqy sport túrlerine bólingen qarajattyń qaıda ketip jatqanyn túsindirgen bolatyn.