Qazaqstan men Grýzııa Transkaspıı baǵytyn damytýǵa nazar aýdardy
ASTANA. KAZINFORM — Ortalyq Azııa elderi men Grýzııanyń syrtqy ister mınıstrleriniń kezdesýi aıasynda Qazaqstan Respýblıkasynyń Syrtqy ister mınıstri Muhtar Tileýberdi Grýzııa Premer-mınıstriniń orynbasary, Syrtqy ister mınıstri Maka Bochorıshvılımen kezdesý ótkizdi.
Taraptar Qazaqstan-Grýzııa qatynastarynyń ózekti máseleleri men strategııalyq áriptestikti odan ári nyǵaıtý perspektıvalaryn talqylady. Saıası dıalogty damytýǵa, saýda-ekonomıkalyq jáne kólik-tranzıttik yntymaqtastyqty, sondaı-aq mádenı-gýmanıtarlyq baılanystardy keńeıtýge erekshe nazar aýdaryldy.
Mınıstrler joǵary jáne asa joǵary deńgeılerdegi aldaǵy baılanystar kestesin qarastyryp, halyqaralyq jáne óńirlik kún tártibindegi máseleler, sonyń ishinde kópjaqty uıymdar aıasyndaǵy ózara is-qımyl jóninde pikir almasty.
Transkaspıı halyqaralyq kólik baǵdaryn damytý kelissózderdiń negizgi taqyryptarynyń biri boldy. Suhbattasýshylar kólik ınfraqurylymyn ózara kelisilgen túrde jańǵyrtý, porttar men temirjoldardyń tıimdiligin arttyrý, tarıftik sharttardy jetildirý jáne elektrondyq qujat aınalymyn engizý máselelerin talqylady.
Ortalyq Azııa elderi men Grýzııa mınıstrleriniń kezdesýi aıasynda kólik, logıstıka, saýda jáne ınvestıtsııalar salalaryndaǵy óńiraralyq yntymaqtastyqty keńeıtý áleýeti atap ótildi. Eýropalyq jáne álemdik naryqtarǵa shyǵý úshin Ortalyq Azııa men Ońtústik Kavkaz óńirleri arasyndaǵy turaqty kólik baılanystarynyń mańyzdylyǵy basa aıtyldy.
Taraptar yntymaqtastyqty odan ári damytýǵa jáne syrtqy saıası vedomstvolar arasynda turaqty dıalog júrgizýge ózara múddeliligin rastady.
Aıta ketelik Grýzııa eksporty 19,6 paıyz ósti: munaı ónimderiniń úlesi artty.
