Qazaqstan men Grýzııa strategııalyq seriktestikti jańa deńgeıge kótermek
ASTANA. KAZINFORM — Qasym-Jomart Toqaev pen Iraklıı Kobahıdze shaǵyn quramda kelissóz júrgizdi, dep habarlaıdy Aqordanyń baspasóz qyzmeti.
Qasym-Jomart Toqaev Iraklıı Kobahıdzege iltıpat kórsetip, atalǵan sapar qazaq-grýzın seriktestigin nyǵaıtýda óte mańyzdy ekenin atap ótti. Sondaı-aq, Prezıdent Qazaqstan men Grýzııa kóptegen baǵytta, sonyń ishinde ekonomıkalyq nemese gýmanıtarlyq salalarda tyǵyz baılanys ornatqanyn alǵa tartty.
— Bul sapar tabysty bolatynyna senimdimin. Qazaqstan Grýzııany strategııalyq turǵydan mańyzdy ári dástúrli seriktesi retinde qarastyratynyn atap ótkim keledi. Biz kóptegen baǵytta, sonyń ishinde ekonomıkalyq nemese gýmanıtarlyq salalarda tyǵyz baılanys ornattyq. Mundaı yqpaldastyq aldaǵy ýaqytta da jalǵasýǵa tıis dep oılaımyn. Memleket basshysy retinde yntymaqtastyǵymyzdyń qarqyndy damyp, nátıjeli bolýyna barlyq kúsh-jigerimdi jumsaımyn. Sizder Qazaqstannyń strategııalyq seriktesi sanalasyzdar. Elińizben dostyqty jáne yntymaqtastyqty joǵary baǵalaımyz. Qazaqstandyqtar Sizdiń elińiz ben halqyńyzdy shyn máninde qurmetteıdi. Búginde kóptegen týrısterimiz Grýzııaǵa baryp, jaqsy kóńil-kúımen oralyp júr. Árıne, áli de iske asyrylmaǵan múmkindikterimiz mol. Sondyqtan ekijaqty yntymaqtastyqqa tyń serpin berý úshin qolda bar áleýetimizdi tıimdi paıdalanýǵa bar kúshimizdi jumyldyrýymyz qajet, — dedi Memleket basshysy.
Iraklıı Kobahıdze Qazaqstanǵa resmı saparmen kelip, joǵary deńgeıde kezdesý ótkizýdi ózine zor mártebe sanaıtynyn aıtty.
— Biz Grýzııa men Qazaqstan arasyndaǵy qarym-qatynasqa erekshe mán beremiz. Seriktestigimizdiń strategııalyq sıpat alǵany qýantady. Yntymaqtastyǵymyzdyń negizgi máni de osynda. Alaıda, Ózińiz atap ótkendeı, júzege aspaǵan áleýetimiz jeterlik. Sondyqtan ony tolyq iske asyrýǵa kúsh salýymyz kerek. Elderimiz arasyndaǵy berik saıası jáne ekonomıkalyq, sondaı-aq bilim berý, mádenıet jáne basqa da kóptegen salalardaǵy yqpaldastyqty qoldaımyz. Barlyq baǵyttaǵy baılanystardy arttyrýǵa aıryqsha nıettimiz. Bul sapardyń mańyzy erekshe. Óıtkeni biz Strategııalyq seriktestik týraly birlesken málimdemege qol qoıamyz. Atalǵan qujattyń ekijaqty yntymaqtastyqqa tyń serpin beretinine senimdimin. Seriktestigimiz ortaq qundylyqtarǵa negizdelgen, sondyqtan qarym-qatynasymyzdyń áleýeti zor. Elderimiz arasyndaǵy dostyq pen ózara yqpaldastyqqa qoldaý kórsetkenińiz úshin alǵys aıtamyn, — dedi Grýzııa Premer-mınıstri.
Buǵan deıin Qasym-Jomart Toqaev Táýelsizdik saraıynda Grýzııa Premer-mınıstrin qarsy alǵanyn jazǵanbyz.
