Qazaqstan men Grýzııa parlamentaralyq yntymaqtastyqty jalǵastyra beredi
ASTANA. KAZINFORM — Senat spıkeri Máýlen Áshimbaev Qazaqstanǵa alǵash ret resmı saparmen kelgen Grýzııa Parlamentiniń tóraǵasy Shalva Papýashvılımen kezdesti. Onda taraptar parlamentaralyq yntymaqtastyqty odan ári nyǵaıtý jáne taǵy basqa ózekti máselelerdi talqylady.
Palata tóraǵasy Grýzııadan kelgen áriptesine iltıpat bildirip, bul sapar parlamentaralyq ózara is-qımyldy jáne memleketter arasyndaǵy yntymaqtastyqty odan ári keńeıtýge tyń serpin beretinin aıtty.
«Grýzııa — Qazaqstannyń Ońtústik Kavkaz óńirindegi mańyzdy seriktesi. Sizdiń saparyńyz bizdiń parlamentaralyq ózara is-qımylymyzdy, sondaı-aq, elderimiz arasyndaǵy yntymaqtastyqty odan ári damytýǵa tyń serpin beredi dep senemin. Sońǵy jyldarda saýda-ekonomıkalyq salasynda belgili bir nátıjege qol jetkizdik. Bul bizdiń ekijaqty qarym-qatynastarymyzdyń draıveri ekeni anyq. Biz túrli baǵyttaǵy yntymaqtastyqty nyǵaıtý jolyndaǵy mindetterdi iske asyrýǵa parlamentter tarapynan da yqpal ete alamyz», — dedi Máýlen Áshimbaev.
Sonymen qatar kezdesýde týrıstik, kóliktik-logıstıkalyq jáne basqa da salalardaǵy yntymaqtasty arttyrý máseleleri talqylandy.
Senat spıkeri Memleket basshysynyń bastamasymen Qazaqstanda iske asyrylyp jatqan keshendi áleýmettik-ekonomıkalyq jáne saıası reformalarǵa, sondaı-aq, Senattyń zań shyǵarý qyzmetine de toqtaldy.
Atap aıtqanda, jańa ekonomıkalyq úlgi qalyptastyrýǵa jáne eldiń ınvestıtsııalyq ahýalyn jaqsartýǵa arnalǵan sharalar týraly sóz boldy.
Óz kezeginde Shalva Papýashvılı kópjaqty qatynasty damytýǵa múddeli ekenin bildirip, Qazaqstandaǵy saıası transformatsııanyń tıimdiligin tilge tıek etti.
