Qazaqstan men Grýzııa ІІM kıberqylmysqa qarsy kúresti kúsheıtýge kelisti
ASTANA. KAZINFORM — Іshki ister mınıstri Erjan Sadenov bastaǵan ІІM delegatsııasy jumys saparymen Grýzııaǵa bardy.
Tbılısı qalasynda Qazaqstan ІІM basshysy Grýzııanyń Іshki ister mınıstri Sýlhan Tamazashvılımen ekijaqty kezdesý ótkizdi.
Kelissóz barysynda qoǵamdyq qaýipsizdikti qamtamasyz etý, uıymdasqan jáne transulttyq qylmysqa qarsy is-qımyl, qylmyskerlerdi izdestirý, zańsyz kóshi-qon arnalary men esirtki qylmysynyń jolyn kesý, sondaı-aq kıberalaıaqtyqtyń zamanaýı shemalaryna qarsy kúres máseleleri talqylandy.
Erjan Sadenov Qazaqstannyń Grýzııany senimdi ári strategııalyq seriktes retinde qarastyratynyn atap ótip, eki vedomstvo arasyndaǵy ózara senim men yntymaqtastyqtyń turaqty damyp kele jatqanyn jetkizdi.
Kezdesýde eki eldiń quqyq qorǵaý organdary arasyndaǵy yntymaqtastyqtyń praktıkalyq nátıjelerine erekshe nazar aýdaryldy. Sondaı-aq bıyl aqpan aıynda Astanada ótken eki vedomstvo basshylarynyń kezdesýinde qol jetkizilgen ýaǵdalastyqtardyń kezeń-kezeńimen júzege asyrylyp jatqany aıtyldy.
Taraptar kóshi-qon salasyn qosa alǵanda, sharttyq-quqyqtyq bazany jetildirý máselelerin de talqylady. Kadr daıarlaý jáne kásibı tájirıbe almasý baǵytyndaǵy ózara is-qımylǵa da aıryqsha mán berildi. Óz kezeginde Qazaqstan ІІM arnaıy polıtsııa bólimshelerin daıarlaý tájirıbesimen bólisýge daıyn ekenin rastady.
Kelissóz qorytyndysy boıynsha taraptar seriktestikti odan ári nyǵaıtýǵa jáne Qazaqstan men Grýzııa ІІM-niń salalyq bólimsheleri arasyndaǵy tikeleı ózara is-qımyldy damytýǵa ózara múddeli ekenin bildirdi. Sapar aıasynda Qazaqstannyń Іshki ister mınıstrin Grýzııanyń Premer-mınıstri Iraklıı Kobahıdze de qabyldady. Kezdesý barysynda qaýipsizdik pen quqyqtyq tártipti qamtamasyz etý salasyndaǵy qazaq-grýzın yntymaqtastyǵyn odan ári nyǵaıtý máseleleri talqylandy.
Aıta ketelik Qazaqstan–Grýzııa: agroónerkásiptegi ózara saýda 116 mln dollarǵa jetti.
