Qazaqstan men Grýzııa kólik-logıstıka salasynda yntymaqtastyqty damytady
ASTANA. KAZINFORM – QR Kólik mınıstri Nurlan Saýranbaev Grýzııanyń ekonomıka jáne turaqty damý mınıstri Marıam Kvrıvıshvılımen kezdesip, eki el arasyndaǵy saýda-ekonomıkalyq yntymaqtastyqty damytý máselelerin talqylady.
Kezdesýde kólik-logıstıka salasyndaǵy yntymaqtastyqqa erekshe kóńil bólindi. Taraptar qosymsha júk aǵyndaryn tartý jáne kólik ınfraqurylymyn damytý boıynsha birlesken úılesimdi jumystardyń mańyzdylyǵyn atap ótip, bul sharalar yntymaqtastyqty nyǵaıtýǵa jáne Orta dálizdiń básekege qabilettiligin arttyrýǵa yqpal etetinin aıtqan.
– Sondaı-aq Grýzııa, Ázerbaıjan jáne Qazaqstan temir joldary arasyndaǵy birlesken kásiporynnyń tıimdi jumys istep jatqany baıandaldy. 2025 jyly atalǵan jobaǵa Qytaı tarapy qosylǵan. Taraptardyń pikirinshe, bul yntymaqtastyq júk tasymaldaryn úılestirýdi jaqsartýǵa jáne dálizdiń tıimdi jumys isteýin qamtamasyz etýge múmkindik beredi, – dep jazylǵan Kólik mınıstrliginiń habarlamasynda.
Kezdesý aıasynda grýzın tarapy kólik salasyndaǵy yntymaqtastyqty damytýǵa eleýli úles qosatyn strategııalyq ınfraqurylymdyq jobalardy tanystyrdy. Atap aıtqanda, Anaklııa porty jobasy, lokomotıv jáne vagon parkin jańartýǵa baǵyttalǵan iri ınvestıtsııalyq jobalar tanystyryldy.
Kezdesý qorytyndysy boıynsha taraptar kólik salasyndaǵy ózara tıimdi yntymaqtastyqty odan ári damytýǵa daıyn ekenderin jetkizdi.
Aıta keteıik, Air Astana áýekompanııasy jazǵy jumys rejımine kóship, Tbılısı men Batýmı qalalaryna ushatyn maýsymdyq reısterdi qaıta ashty.
