Qazaqstan men Grýzııa ınternet-alaıaqtyqqa qarsy kúresti kúsheıtedi
ASTANA. KAZINFORM — Astanada kıberqylmysqa qarsy kúres jónindegi halyqaralyq konferentsııa aıasynda Qazaqstan Respýblıkasynyń ishki ister mınıstri Erjan Sadenov pen Grýzııanyń ishki ister mınıstri Sýlhan Tamazashvılıdiń ekijaqty kezdesýi ótti.
Vedomstvo basshylary transulttyq qylmysqa jáne ınternet-alaıaqtyqqa qarsy kúres, qylmyskerlerdi izdestirý, sondaı-aq kóshi-qon qaýipsizdigin qamtamasyz etý baǵyttaryndaǵy yntymaqtastyqty odan ári damytý máselelerin talqylady. Kezdesý barysynda birlesken jumystyń naqty nátıjelerine erekshe nazar aýdaryldy.
Erjan Sadenov qylmystyq qýdalaýdan jasyrynyp júrgen adamdardy izdestirý jáne ustap berý máselelerinde grýzııalyq áriptesteriniń jedel áreket etýine joǵary baǵa berdi. Kıberqylmysqa qarsy is-qımyl máseleleri de jeke qaraldy.
Taraptar beıindi bólimsheler arasyndaǵy ózara is-qımyldy kúsheıtý, jedel aqparat almasýdy jetildirý jáne birlesken is-qımyldardy úılestirý máselelerin talqylady. Yntymaqtastyqtyń mańyzdy baǵyttarynyń biri — polıtsııa kadrlaryn daıarlaý. Eki eldiń vedomstvolyq oqý oryndary arasynda qol qoıylǵan memorandým aıasynda akademııalyq almasý, taǵylymdamadan ótý jáne birlesken ǵylymı zertteýler júrgizý baǵdarlamalary pysyqtalyp jatyr.
Sonymen qatar kóshi-qon qaýipsizdigi salasyndaǵy ózara is-qımyldy odan ári damytý máseleleri talqylandy. Mınıstrler eki memlekettiń quqyq qorǵaý organdary arasyndaǵy jedel ózara is-qımyldy qamtamasyz etetin baılanys ofıtserleri jumysynyń tıimdiligin atap ótti.
Bul — vedomstvo basshylarynyń bıylǵy ekinshi kezdesýi. Atalǵan kezdesý ekijaqty yntymaqtastyqtyń júıeli túrde damyp, buǵan deıin qol jetkizilgen ýaǵdalastyqtardyń iske asyrylyp jatqanyn kórsetedi.
Kelissózder qorytyndysy boıynsha taraptar qylmysqa qarsy kúres, azamattardyń qaýipsizdigin qamtamasyz etý jáne jazanyń bultartpastyǵy qaǵıdatyn iske asyrý baǵyttaryndaǵy ózara is-qımyldy nyǵaıtýǵa daıyn ekenderin rastady.
