Qazaqstan men Grýzııa e-Permit júıesi arqyly elektrondy ruqsat almasýdy iske qosady
ASTANA. KAZINFORM – 22 shildeden bastap e-Permit júıesi arqyly ruqsat blankilerin elektrondy formatta berý jáne almasýdy synaq rejıminde bastaý týraly kelisimge keldi
Astana qalasynda Halyqaralyq avtomobıl qatynasy máseleleri jónindegi Qazaqstan-Grýzııa aralas komıssııasynyń kezekti otyrysy ótti.
Kezdesý qorytyndysy boıynsha taraptar 2026 jylǵy 22 shildeden bastap e-Permit júıesi arqyly ruqsat blankilerin elektrondy formatta berý jáne almasýdy synaq rejıminde bastaý týraly kelisimge keldi.
Otyrys barysynda elektrondy qujat aınalymyna kóshý ákimshilik rásimderdi qysqartyp, tasymaldaý protsedýralarynyń ashyqtyǵyn arttyrýǵa jáne halyqaralyq avtomobıl tasymaldaryn rásimdeý ýaqytyn jedeldetýge múmkindik beretini atap ótildi. Sondaı-aq taraptar elektrondy almasý júıesine tolyq kóshkennen keıin ruqsattardyń shekteýsiz kvotasyn engizýge daıyn ekenderin rastady.
Kezdesýde ekijaqty jáne tranzıttik júk tasymaldaryn damytýǵa qatysty ózekti máseleler de qaraldy. Taraptar júk tasymaly kóleminiń turaqty ósip kele jatqanyn atap ótip, Qazaqstan men Grýzııanyń halyqaralyq kólik dálizderin damytýdaǵy mańyzdy rólin rastady.
Tasymaldaýshylardyń suranysyn qamtamasyz etý maqsatynda 2026 jylǵa qosymsha 6 000 ruqsat blankisimen ózara almasý týraly sheshim qabyldandy.
Sonymen qatar 2027 jylǵa arnalǵan aldyn ala ruqsattar kvotasy 20 500 kóleminde kelisildi. Bul ótken kezeńmen salystyrǵanda 6 000 blankige artyq. Kvotanyń ulǵaıýy halyqaralyq avtomobıl tasymaldaryna degen suranysty qamtamasyz etip, Qazaqstan men Grýzııa arasyndaǵy saýda-ekonomıkalyq baılanystardy odan ári damytýǵa yqpal etedi.
Otyrys qorytyndysy boıynsha taraptar halyqaralyq avtomobıl tasymaly salasyndaǵy ekijaqty yntymaqtastyqty odan ári nyǵaıtýǵa nıetti ekendigin bildirip, kólik salasyndaǵy seriktestikti damytý jumystary jalǵasatynyn atap ótti.
Aıta ketelik Qazaqstannan Grýzııaǵa jańa áýe reısi iske qosylady.
