Qazaqstan men Grýzııa depýtattary zań shyǵarý isinde tájirıbe almasýdy kúsheıtedi
ASTANA. KAZINFORM – Májilis spıkeri Erlan Qoshanov Qazaqstanǵa resmı saparmen kelgen Grýzııa Parlamentiniń tóraǵasy Shalva Papýashvılımen kezdesti.
Bul – Shalva Papýashvılıdiń Astanaǵa alǵashqy resmı sapary. Grýzııa Parlamenti delegatsııasyn qarsy alǵan Erlan Qoshanov qazaq jáne grýzın halyqtaryn tyǵyz tarıhı qarym-qatynas pen mádenı dástúrler baılanystyratynyn atap ótti. Eki el arasynda dıplomatııalyq qatynas ornaǵaly tıimdi saıası dıalog jolǵa qoıyldy.
– Qazaqstan Grýzııamen jan-jaqty yntymaqtastyqty odan ári nyǵaıtýǵa úlken mán beredi. Búgingi kezdesý parlamentaralyq áriptestikti odan ári damytý máselelerin keńinen talqylaýǵa múmkindik beredi. Prezıdent Qasym-Jomart Toqaevtyń bastamasymen elimizde aýqymdy saıası jáne ekonomıkalyq reformalar júzege asyrylyp jatyr. Sapar barysynda osy ózgeristermen keńirek tanysasyz dep oılaımyn. Olar bıliktiń barlyq tarmaqtarynyń jumysyn tolyǵymen qaıta jandandyrdy jáne qoǵamnyń saıasatqa aralasýyn arttyrdy, – dedi Májilis spıkeri.
Kezdesý kezinde Erlan Qoshanov konstıtýtsııalyq reforma, Prezıdent pen Parlament saılaýlarynyń qorytyndylary jáne Konstıtýtsııalyq Sottyń qyzmeti týraly aqparat berdi. Sonymen qatar jańarǵan Májilistiń zańnamalyq qyzmetimen tanystyrdy.
Óz kezeginde Grýzııa Parlamentiniń tóraǵasy Qazaqstan tarapyna qonaqjaılyǵy úshin alǵysyn bildirip, bul resmı sapar parlamentaralyq qatynastyń damýyna tyń serpin beretinine senim bildirdi.
– Árıne, parlamentterde atqarýshy bıliktiń tetikteri joq, biraq olardyń qolynda eki mańyzdy qural bar. Birinshisi – eldiń damý saıasatyn aıqyndaý, ekinshisi – osy saıasatty iske asyrý úshin quqyqtyq baza qurý. Úkimetterimiz ekijaqty yntymaqtastyqty tabysty damytýy úshin biz – depýtattar kóp nárse jasaı alamyz, – dedi Shalva Papýashvılı.
Grýzııa delegatsııasynyń basshysy Qazaqstan óńirlerindegi sý tasqynyn tez arada eńserýge tilektestik bildirdi.
Taraptar genderlik teńdik, áıelder men balalardyń quqyqtaryn qorǵaý, bıýdjet jáne salyq zańnamasyn reformalaý, sáýlet-qurylys qyzmeti sııaqty máseleler boıynsha eki el parlamentteriniń kún tártibiniń uqsas ekenin atap ótti. Spıkerler osy baǵyttarda tıisti komıtetterdiń depýtattary arasynda tájirıbe almasýǵa kelisti.
– Áriptes retinde Siz zańnamany jańartý ýaqyt talaby ekenin jaqsy túsinesiz. Al depýtattardyń mindeti – túrli salada bolyp jatqan ózgeristerge der kezinde zańnamalyq turǵyda nazar aýdarý, – dedi Májilis spıkeri.
Taraptar Qazaqstan men Grýzııa arasyndaǵy ekonomıka, agroónerkásip, kólik-tranzıt, týrızm jáne mádenı-gýmanıtarlyq salalardaǵy yntymaqtastyqty keńeıtý perspektıvalaryn talqylady. Sonymen qatar Erlan Qoshanov grýzııalyq seriktesterdi yntymaqtastyqty nyǵaıtýdyń bir múmkindigi retinde «Astana» halyqaralyq qarjy ortalyǵynyń jumysymen muqııat tanysýǵa shaqyrdy jáne Qazaqstandaǵy grýzın ınvestıtsııalarynyń quqyqtyq turǵyda qorǵalatynyna sendirdi.
