Qazaqstan men Grýzııa arasyndaǵy aýyl sharýashylyǵy ónimderiniń taýar aınalymy 77%-ǵa artty
ASTANA. KAZINFORM – Aýyl sharýashylyǵy mınıstri Aıdarbek Saparov Grýzııanyń Qorshaǵan ortany qorǵaý jáne aýyl sharýashylyǵy mınıstri Davıd Songýlashvılımen kezdesti.
Kezdesý barysynda taraptar agroónerkásiptik keshen salasyndaǵy ekijaqty yntymaqtastyqty odan ári damytý, aýyl sharýashylyǵy ónimderiniń ózara saýdasyn keńeıtý jáne birlesken ınvestıtsııalyq jobalardy iske asyrý máselelerin talqylady.
Aıdarbek Saparovtyń aıtýynsha, Grýzııa Qazaqstannyń Kavkaz óńirindegi negizgi seriktesteriniń biri. Atap ótkenindeı, aýyl sharýashylyǵy eki el ekonomıkasy úshán de strategııalyq mańyzy zor.
— Aýyl sharýashylyǵy ónimderi boıynsha ózara saýda turaqty ósýde. Byltyrǵy jyldyń qorytyndysy boıynsha Qazaqstan men Grýzııa arasyndaǵy aýyl sharýashylyǵy ónimderiniń taýar aınalymy 77%-ǵa artyp, 116 mln AQSh dollarynan asty. Bul — eki el arasyndaǵy yntymaqtastyqtyń áleýeti joǵary ekendiginiń jáne odan ári keńeıtýge berik negiz qalanǵanyn kórsetedi, — dedi mınıstr.
Óz kezeginde Davıd Songýlashvılı agrarlyq saladaǵy ekijaqty yntymaqtastyq deńgeıiniń joǵary ekenin atap ótip, áriptestikti odan ári nyǵaıtýǵa, aýyl sharýashylyǵy ónimderiniń saýdasyn keńeıtýge, birlesken ınvestıtsııalyq jobalardy júzege asyrýǵa jáne agroónerkásiptik keshendegi ozyq tehnologııalarmen almasýǵa qyzyǵýshylyq tanytatynyn jetkizdi.
Kezdesýde Grýzııa naryǵyna qazaqstandyq aýyl sharýashylyǵy ónimderin jetkizý kólemin ulǵaıtý máselesine erekshe nazar aýdaryldy. Qazaqstan tarapy astyq, un, ósimdik maıy, makaron ónimderi, et, sút ónimderi, shokolad jáne kondıterlik ónimder eksportyn arttyrýǵa múddeli ekenin bildirdi.
Taraptar veterınarııa salasyndaǵy yntymaqtastyq máselelerin de talqylady. Atap aıtqanda, Qazaqstannan Grýzııaǵa tiri shoshqa men shoshqa etin eksporttaýǵa qatysty veterınarııalyq-sanıtarııalyq talaptardy kelisý rásimderin aıaqtaýdyń, sondaı-aq asyl tuqymdy jáne taýarlyq iri qara men usaq maldy eksporttaýǵa arnalǵan buryn kelisilgen veterınarııalyq sertıfıkattardy is júzinde qoldanýdyń mańyzdylyǵy aıtyldy.
— Qazaqstan men Grýzııa arasyndaǵy yntymaqtastyqty jandandyrý eki eldiń agroónerkásiptik kesheniniń damýyna, azyq-túlik qaýipsizdigin nyǵaıtýǵa jáne bıznes úshin jańa múmkindikterdiń ashylýyna yqpal etedi dep senemin, — dedi Aıdarbek Saparov.
Aıta ketelik Memleket basshysy Qazaqstan men Grýzııa arasynda «jol kartasyn» ázirleýdi usynǵan edi.
