Qazaqstan men Grekııa kólik jáne logıstıka salalary boıynsha yntymaqtastyqty nyǵaıtady
ASTANA.KAZINFORM - 14-16 mamyr aralyǵynda qazaqstandyq kólik delegatsııasy Grekııa Respýblıkasyna sapar jasady, dep habarlaıdy Kazinform tilshisi.
Qazaqstandyq kólik salasynyń mamandary Afınadaǵy Elshiligimizdiń qoldaýymen Grekııaǵa bardy. Delegatsııa quramynda QR Kólik mınıstrligi Temir jol jáne sý kóligi komıtetiniń, Aqtaý halyqaralyq teńiz saýda portynyń, «Qazteńizkólikfloty» AQ, «Kedentransservıs» AQ, «Kaspi Grain Way» JShS, «Kazakh Invest» ulttyq kompanııasynyń ókilderi boldy.
Sapar 2024 jylǵy 13 qarashada Bakýde COP-29 halyqaralyq konferentsııasy aıasynda QR Prezıdenti Qasym-Jomart Toqaev pen Grekııa Respýblıkasynyń Premer-Mınıstri Kırıakos Mıtsotakıstiń kezdesýinde jasalǵan ýaǵdalastyqtardy ázirleý maqsatynda ótti.
Sapardyń negizgi taqyryby - Transkaspıı halyqaralyq kólik baǵytynyń («Orta dáliz») áleýetin jáne onyń Grekııanyń kólik jáne port ınfraqurylymymen ıntegratsııasyn talqylaý.
Grekııa kásiporyndar federatsııasymen (SEV) birlese uıymdastyrylǵan dóńgelek ústelde qazaqstandyq tarap Kaspıı porttaryn jańǵyrtýdyń perspektıvalyq jobalaryn, sondaı-aq sheteldik ınvestıtsııalardy tartý sharttary men tetikterin tanystyrdy. Grekııalyq seriktester birlesken mýltımodaldy logıstıkalyq qyzmetterdi qurýǵa qyzyǵýshylyq tanytty.
Sapar barysynda memleket aktıvterin basqaratyn jáne porttardy damytý salasyndaǵy jobalardy júzege asyratyn Gretsııanyń Growthfund PPF Ulttyq ınvestıtsııalyq qorynyń basshylyǵymen, sondaı-aq birikken floty 280 kemeden asatyn Navios Maritime Holdings jáne Tsakos Group jetekshi keme qatynasy kompanııalarynyń basshylyǵymen kezdesýler ótti.
Delegatsııa sonymen qatar Grekııanyń eń iri - Pıreı portynda bolyp, Skaramangas jáne Elefsis (ONEX Group) keme jasaý kompanııalarynyń óndiristik qýatymen, sondaı-aq qaldyqtardy óńdeý jáne munaı qaldyqtaryn joıý salasyndaǵy jetekshi grek kompanııasy POLIECO qyzmetimen tanysty.
Grekııa Respýblıkasynyń Syrtqy ister mınıstrliginde Bas hatshy Dımıtrıs Skalkospen jáne tıisti mınıstrlikterdiń ókilderimen ótken kelissózderge erekshe nazar aýdaryldy. Taraptar Kaspıı-Qara teńiz-Jerorta teńizi baǵytyn eýropalyq kólik jelilerine, onyń ishinde jahandyq shlıýz bastamasy aıasynda ıntegratsııalaý perspektıvalaryn, sondaı-aq ınstıtýtsıonaldy deńgeıdegi dıalogty tereńdetý máselelerin talqylady.
Atap aıtqanda, Dımıtrıs Skalkos Transkaspıı halyqaralyq kólik baǵytyn damytý Grekııa men Qazaqstan arasyndaǵy yntymaqtastyqty tereńdetýge jol ashatynyn jáne jańa kólik jelilerin Balqanmen organıkalyq baılanystyrýǵa múmkindik beretinin atap ótti.
Qazaqstandyq delegatsııanyń basshysy, QR Kólik mınıstrligi Temir jol jáne sý kóligi komıteti tóraǵasynyń orynbasary Qasym Tilepov Transkaspıı halyqaralyq baǵytyn damytý Qazaqstan úshin eksporttyq baǵyttardy ártaraptandyrýdyń negizgi basymdyǵy bolyp qala beretinin erekshe atap ótti.
Ol grek kompanııalaryn porttyq jáne logıstıkalyq ınfraqurylymdy jańǵyrtýǵa qatysýǵa shaqyryp, ınvestorlar úshin barynsha qolaıly jaǵdaı jasaýǵa kepildik berdi.
Onyń aıtýynsha, bul jobalardy júzege asyrý óńirlik jetkizý tizbekteriniń turaqtylyǵyn nyǵaıtyp, ekijaqty saýdaǵa da, Eýropa elderimen keńeıtilgen yntymaqtastyqqa da jańa serpin beredi.
Qazaqstan Respýblıkasynyń Grekııadaǵy Elshisi Tımýr Sultanǵojın Qazaqstan men Grekııa óz aımaqtaryndaǵy mańyzdy kólik-logıstıkalyq habtar bola otyryp, birlesken jobalardy júzege asyrýǵa jáne ekijaqty qarym-qatynastardy nyǵaıtýǵa keń múmkindikterge ıe ekenin atap ótti.
Sapar nátıjesinde eki eldiń tıisti vedomstvolary men isker toptary arasynda ınstıtýtsıonaldy yntymaqtastyqty nyǵaıtý jáne tikeleı baılanystar ornatýda aıtarlyqtaı jetistikterge qol jetkizildi. Bul kólik, logıstıka jáne jasyl tehnologııalar salasyndaǵy Qazaqstan-Grekııa yntymaqtastyǵyn odan ári keńeıtý, sondaı-aq aldaǵy joǵary deńgeıli baılanystarǵa daıyndyq úshin negiz boldy.
Aıta keteıik, «Orta dáliz» boıynsha tasymaldaý rekordtyq kórsetkishke - 3,3 mıllıon tonnaǵa jetti. Bul rette jalpy tasymaldaý kóleminiń 80 paıyzdan astamy Qazaqstan úlesine tıedi.
Osyǵan deıin Qazaqstannyń Gretsııaǵa dándi daqyldardy eksporttaıtyny týraly jazdyq.