Qazaqstan men Gonkong IT-tehnologııalar salasynda tájirıbe almasady
ASTANA. QazAqparat - «Elektrondy kommertsııalar ortalyǵy» AQ men Gonkongtaǵy IT-ındýstrııanyń jetekshi ókilderi IT-tehnologııalar salasynda tájirıbe jáne bilim almasý máseleleri boıynsha kelisimge qol qoıdy, dep habarlaıdy QazAqparat QR Qarjy mınıstrliginiń baspasóz qyzmetine silteme jasap.
Ýaǵdalastyq 4-6 sáýir kúnderi QR Bas Konsýldyǵynyń qoldaýymen uıymdastyrylǵan jumys kezdesýleri aıasynda bekitildi. Atap aıtqanda, kelissózder Gonkongtyń bas aqparat ofıtseri Allen ıAng pen Gonkong Monetarlyq basqarmasynyń qarjylyq tehnologııalarǵa kómektesý Keńsesiniń basshylyǵy tarapynan júrgizilgen.
Odan bólek, Gonkongtyń «Cyberport» IT-parkiniń, Ǵylymı-tehnologııalyq parkter men Gonkong azııalyq-qarjylyq tehnologııalar ınstıtýtynyń ókilderimen kezdesý uıymdastyrylǵan.
Kelissózder barysynda qazaqstandyq delegatsııa Gonkongtyń memlekettik jeke jáne qurylymdaryna QR Qarjy mınıstrliginiń memlekettik qyzmet kórsetýin tsıfrlandyrý protsesi boıynsha Elektrondy kommertsııalar ortalyǵynyń qazirgi qyzmeti men strategııalyq mindetterin tanystyrdy.
Sonymen birge, qazaqstandyq tarap Gonkongtyń ekonomıkany tsıfrlandyrý, memlekettik organdar men bıznestegi elektrondy qyzmettermen jáne elektrondy kommertsııa, qarjylyq tehnologııalar men startap-ındýstrııany damytý qarqynymen tanys boldy.
Gonkongtyń búginde iri startap-ortalyq ekenin jáne Azııadaǵy damyǵan IT-ındýstrııasy bar el ekenin eskere otyryp, Qarjy mınıstrligi qyzmetkerleriniń aqparattyq tehnologııalar salasyndaǵy kadrlyq áleýetin kóterý maqsatynda qos tarap memlekettik qyzmet kórsetý, beıindi mamandar arasyndaǵy baılanysty ornatý júıesine IT-tájirıbelerdi engizý máseleleri boıynsha tájirıbe almasýǵa ýaǵdalasty.
