Qazaqstan men Gonkong arasyndaǵy taýar aınalymy 178,8 mln dollarǵa jetti
ASTANA. KAZINFORM – Qazaqstan men Gonkong saýda-ekonomıkalyq yntymaqtastyqty keńeıtip, ınvestıtsııalyq áriptestikti damytý jóninde ýaǵdalasty.
QR Saýda jáne ıntegratsııa mınıstri Arman Shaqqalıev Gonkong arnaıy ákimshilik aımaǵynyń basshysy Djon Lımen jáne jergilikti iskerlik qaýymdastyq ókilderimen kezdesti. Taraptar ózara saýdany ulǵaıtý, ınvestıtsııa tartý jáne bıznes úshin jańa múmkindikter qalyptastyrý máselelerin talqylady.
Kezdesý barysynda Gonkongtyń álemdegi jetekshi qarjy, saýda jáne logıstıka ortalyqtarynyń biri ekeni, al Qazaqstannyń Ortalyq Azııa, Eýrazııalyq ekonomıkalyq odaq jáne Eýropa naryqtaryna shyǵatyn mańyzdy óńirlik hab retindegi róli atap ótildi.
– 2025 jyldyń qorytyndysy boıynsha Qazaqstan men Gonkong arasyndaǵy taýar aınalymy 178,8 mln AQSh dollaryn qurady. Biz Gonkong naryǵyna jetkiziletin qazaqstandyq ónim kólemin arttyrýǵa múddelimiz. Bul qatarǵa aýyl sharýashylyǵy ónimderimen birge jeńil jáne tamaq ónerkásibiniń taýarlary da kiredi, – dedi Arman Shaqqalıev.
Taraptar altyn saýdasy, bırjalyq ınfraqurylym jáne qarjylyq qyzmetter salasyndaǵy yntymaqtastyqtyń jańa baǵyttaryn da talqylady. Gonkong ákimshiliginiń basshysy Djon Lı halyqaralyq altyn saýdasy ortalyǵyn qurý jáne baǵaly metaldar naryǵyna arnalǵan zamanaýı ekojúıe qalyptastyrý josparlarymen bólisti.
Onyń aıtýynsha, Qazaqstan óńirdegi jetekshi altyn óndirýshi elderdiń biri retinde halyqaralyq baǵaly metaldar saýdasynda mańyzdy oryn ala alady.
– Qazaqstannyń óńirdegi jetekshi altyn óndirýshi elderdiń biri ekeni belgili. Bul baǵyttaǵy yntymaqtastyqty damytý eki taraptyń da óndirýshileri men qarjy ınstıtýttary úshin jańa múmkindikterge jol ashady, – dedi Djon Lı.
Kezdesý barysynda iskerlik qaýymdastyqtar arasyndaǵy tikeleı baılanystardy nyǵaıtý, saýda ókildikteriniń jumysyn keńeıtý jáne birlesken ınvestıtsııalyq jobalardy iske asyrý máseleleri de qaraldy.
Kezdesý qorytyndysynda taraptar birlesken is-qımyl josparyn ázirleýge kelisti. Qujat aıasynda bıznes-mıssııalar uıymdastyrý, kásipkerler arasynda kezdesýler ótkizý jáne ınvestıtsııalyq jobalardy pysyqtaý kózdelip otyr.
Aıta keteıik, buǵan deıin Qazaqstan, Gonkong jáne Qytaı kompanııalary 42 kelisimge qol qoıǵany habarlandy.
