Qazaqstan men Gollıvýd túsirgen fılmdegi Ámireniń ánderin qaraǵandylyq oryndady
ASTANA. QazAqparat - Qaraǵandylyq Serjan Musaıyn Ámire Qashaýbaev týraly fılmde tanymal tenordyń ánderin oryndady, dep habarlaıdy óńir basshysynyń resmı saıty .
Saýndtrek qazir AQSh-ta jazylyp jatyr. Fılmde 1925-shi jyly Ámire Qashaýbaev Parıj kórermenderiniń júregin jaýlap alǵan kompozıtsııalar bolady.
Serjan Musaıyn - Qalı Baıjanov atyndaǵy Qaraǵandy kontserttik birlestiginiń jetekshi solısi, qazaq halyq ánderin oryndaýshy ánshi.
Tanymal qazaq tenorynyń Parıjdegi aıryqsha jetistigi men onyń qaıǵyly ómir joly týraly fılmniń eki jumys ataýy bar: «Ámire» jáne «Parıjdegi án». Ol «Qazaqfılm» tapsyrysy boıynsha "Moving" amerıkandyq kınostýdııamen túsirildi. Túsirilimge gollıvýdtyq, reseılik, latvııalyq jáne qazaq kınoındýstrııa mamandary qatysty. Fılmniń qoıýshy rejısseri - Djeff Vespa, operator - Maksım Osadchıı ("9 rota", "Stalıngrad"). Basty róldi qazaqstandyq akter Sanjar Mádıev oryndaıdy, Mustafa Shoqaıdyń beınesin Erkebulan Daıyrov somdaıdy. Sonymen qatar túsirilimge brıtandyq akter Ben Aldrıdj jáne «Oblast tmy» fılmi boıynsha tanymal bolǵan amerıkalyq aktrısa Ebbı Kornısh jumyldyryldy. Prodıýserler: Alıdar Ótemuratov, Kerı Granat jáne Ed Djonson.
Kartına qazaqtyń asyl daýysy Ámire Qashaýbaev EKSPO sheńberinde Parıjde ótken Dúnıejúzilik mýzykalyq baıqaýda eýropalyq kórermenderdiń júregin jaýlaǵany týraly baıandaıdy. Dramalyq tenor álem boıynsha birinshi bolyp batysta qazaqtyń vokaldy-oryndaýshylyq ónerin jáne dombyra ulttyq aspabyn tanystyrdy. Ánshi kúshti áser qaldyryp, kúmis medal jeńip aldy.
Fılmniń túsirilimi Rıgada jáne Almaty qalasynyń mańynda ótti. Túsirilim ótken jyly aıaqtaldy, qazir qorytyndy kezeń - ánderdi jazý júrgizilip jatyr. Respýblıkalyq kastıngtiń qorytyndysy boıynsha Ámireniń kompozıtsııalaryn oryndaý qurmeti qaraǵandylyq ánshi, pedagog, respýblıkalyq baıqaýlar men festıvalderde júlderi oryndar men Gran-prı ıegeri atanǵan Serjan Musaıynǵa buıyrdy. Oǵan «Balqadısha», «Úsh dos», «Bes qarager» jáne «Dýdar-aı» sekildi ánderdi oryndaý kerek bolady. Sonymen qatar Serjan Musaıynnyń daýysy kartınanyń keıbir epızodtarynda, bas keıipker án aıtqanda estiledi.
- Men úshin fılmde dál meniń daýysym shyǵatyny úlken mańyzǵa ıe, - dep bólisti Serjan Musaıyn. - Qazir biz «taza» daýysty kadrlardyń ústine jazyp jatyrmyz. Qıyndyqtar týyndaıdy, ásirese dombyramen án aıtqanymda akterdiń artıkýlıatsııasyna dál túsý kerek kezde. Qoldyń jyljýyn salý óte qıyn bolyp shyqty. Sebebi ondaı jaǵdaıda ánniń áýeni ózgeredi. Qoldyń iri plandary kóp emes, biraq sonyń ózi meniń jumysymdy kúrdeli etedi. Akterdiń artıkýlıatsııasymen tamasha boldy - munda esh problema týyndaǵan joq.
Serjan Musaıyn bárinen buryn qıyn bolǵany dombyramen oınaýdy jáne án aıtýdy jazý deıdi. Sebebi oryndaýshylar dombyramen án aıtý barysynda ımprovızatsııalaıdy.
- Men onyń barlyǵyn qıyn bolsa da, durys jasaı aldym dep oılaımyn. Dybys rejısserleri alǵash ret fılmdi dybystaǵan adam úshin atqarylǵan jumys tamasha dedi. Degenmen amerıkandyqtar maqtaýda aldaryna jan salmaıdy dep oılaımyn. Jumys áli aıaqtalǵan joq. Nátıjesine kórermender baǵa beredi dep oılaımyn».
Fılmdi túsirýshiler ony úlken ekrandarǵa osy jyly shyǵarýdy josparlap otyr.
