Qazaqstan men Germanııa úkimetteri ekonomıkalyq yntymaqtastyqty talqylaıdy

NUR-SULTAN. QazAqparat – Saýda-ekonomıkalyq yntymaqtastyq jónindegi qazaqstandyq-german úkimetaralyq jumys tobynyń 13-shi otyrysy ótedi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Búgin Qazaqstan Syrtqy ister mınıstrliginde Saýda-ekonomıkalyq yntymaqtastyq jónindegi qazaqstandyq-german úkimetaralyq jumys tobynyń 13-shi otyrysy ótedi. Qazaqstandyq delegatsııany QR Syrtqy ister mınıstriniń orynbasary Almas Aıdarov, al Germanııanyń delegatsııasyn Ekonomıka jáne klımatty qorǵaý federaldyq mınıstrliginiń syrtqy ekonomıkalyq saıasat máseleleri jónindegi dırektory Domınık Shnıhels basqarady», - dedi Aıbek Smadııarov vedomstvonyń baspasóz qyzmeti alańynda ótken brıfıngide.

Onyń dereginshe, otyrys barysynda taraptar shıkizat yntymaqtastyǵy, energetıka, ónerkásip jáne arnaıy ekonomıkalyq aımaq, aýyl sharýashylyǵy jáne azyq-túlik qaýipsizdigi, kólik-logıstıka salasy, bilim berý, ǵylym jáne tehnıkalyq kadrlardy daıarlaý, sondaı-aq Qazaqstandaǵy nemis kompanııalarynyń qatysýyn keńeıtý sııaqty eki el arasyndaǵy ózara tıimdi yntymaqtastyqtyń naqty taqyryptyq bloktaryn qaraıdy.

«Shıkizat, ónerkásip jáne tehnologııalyq salalardaǵy áriptestik týraly úkimetaralyq kelisimdi is júzinde tolyqtyrý máselelerine erekshe nazar aýdarylatyn bolady», - dedi ol.

Foto: gov.kz