Qazaqstan men Germanııa tehnıkalyq jáne kásiptik bilim berý salasyndaǵy yntymaqtastyqty keńeıtedi
ASTANA. KAZINFORM - Qazaqstan men Germanııa tehnıkalyq jáne kásiptik bilim berý men oqytý salasyndaǵy yntymaqtastyq nıetteri týraly birlesken deklaratsııaǵa qol qoıdy. Qujat Qazaqstan Prezıdenti Qasym-Jomart Kemeluly Toqaevtyń Germanııaǵa resmı sapary barysynda eki el mınıstrleriniń kezdesýi qorytyndysy boıynsha qabyldandy.
Qazaqstannyń Oqý-aǵartý mınıstri Juldyz Súleımenova Germanııanyń Bilim, otbasy, qarttar, áıelder jáne jastar isteri jónindegi federaldyq mınıstri Karın Prınmen yntymaqtastyqtyń keleshegin talqylady.
Kásiptik bilim berýdi damytý Prezıdenttiń Qazaqstan-Germanııa bıznes-forýmynda sóılegen sóziniń negizgi taqyryptarynyń biri boldy. Memleket basshysy Germanııanyń dýaldy bilim berý júıesin joǵary baǵalap, iri ınvestıtsııalyq jobalardy iske asyrýmen tikeleı baılanysty Qazaqstan-Germanııa ónerkásiptik quzyretter ortalyqtarynyń jelisin qurýdy usyndy.
Kezdesýde mınıstrler dýaldy oqytýdy damytý, pedagogter men stýdentterge taǵylymdama uıymdastyrý jáne eki el kolledjderi arasynda tájirıbe almasý máselelerin talqylady. Mamandar daıarlaý eńbek naryǵynyń qajettilikterine saı bolýy úshin jumys berýshilermen ózara is-qımyldy nyǵaıtýǵa erekshe mán berildi.
Áriptestiktiń naqty tájirıbesi bar. Almaty qurylys-tehnıkalyq kolledji kóptegen jyldar boıy GROHE, KNAUF jáne BOSCH kompanııalarymen yntymaqtastyq ornatyp keledi. Kolledj bazasynda zamanaýı quzyretter ortalyqtary jumys isteıdi. KNAUF kompanııasymen 20 jyldan astam ýaqytqa sozylǵan yntymaqtastyq aıasynda eki myńnan astam stýdent bilim aldy.
Kezdesýde kásiptik bilim berýdi tsıfrlandyrý jáne jasandy ıntellektini qoldaný máseleleri de talqylandy.
Qol qoıylǵan deklaratsııa birlesken jobalardy keńeıtýge, kolledj stýdentteri men pedagogteriniń kásibı damýyna jańa múmkindikter ashýǵa negiz bolady.
Aıta keteıik, osyǵan deıin Qazaqstan men Germanııa 2 mlrd dollarlyq 30-dan astam qujatqa qol qoıǵany týraly jazdyq.
