Qazaqstan men Germanııa - taǵdyrlas elder - R.Eppelman
ASTANA. Qazannyń 4-i. QazAqparat /Arman Asqarov/ - Búgin Lev Gýmılev atyndaǵy Eýrazııa ulttyq ýnıversıtetinde Germanııanyń tarıhı zerdeleý qorynyń tóraǵasy Raıner Eppelman stýdentterge arnap dáris oqydy,
dep habarlaıdy QazAqparat.
Kezdesý aıasynda R.Eppelman Qazaqstan men Germanııa elderiniń ózara taǵdyrlas ekendigine toqtalyp, jańarýǵa bet alǵan qazaq eliniń búgingi saıası-ekonomıkalyq jetistikterine joǵary baǵa berdi. «Tarıhqa úńilip qaraıtyn bolsaq, 1989 jyly qazannyń 9-y kúni nemis stýdentteri Keńes úkimetiniń dıktatýrasyna qarsylyq bildirip, 70 myń adam bolyp kóshege shyqqan bolatyn. Sol kezde halyqtyń kúshin kórgen Germanııanyń basshylyǵy alǵash ret áskerdiń kómeginen bas tartýǵa májbúr boldy. Al 1953 jyly oryn alǵan osy ispetti narazylyq sherýleri kezinde Keńes úkimetiniń tankileri adamdardy basyp, erkindikti ańsaǵan nemis jastarynyń kúl-talqanyn shyǵarǵan edi. Endi, qarańyz, 53-shi jáne 89-shy jyldardyń aralyǵynda nemis qoǵamynyń sanasy túbegeıli ózgerdi. Sodan bastap biz uzaq ári aýyr transformatsııany bastap ótkerip, saıası-ekonomıkalyq jańarýdan óttik. Baıqap qarasaq, Qazaqstan da osyndaı saıası tóńkerister arqyly búgingi beıbit ómirge qol jetkizip otyr. Al, eń bastysy, qazaq eli oǵan óz kúshimen, óziniń talap-tilegimen jetip, qazirgi jańarýdyń jańasha satysyna shyǵyp otyr. Biz óz tarapymyzdan Qazaqstanǵa árqashan qoldaý jasaýǵa daıarmyz», - dedi R. Eppelman.
