Sý salasyndaǵy seriktestik: Qazaqstan men Germanııa jańa jobalardy qarastyrdy
ASTANA. KAZINFORM — Sý resýrstary jáne ırrıgatsııa vıtse-mınıstri Aslan Abdraımov Germanııa qoǵamynyń halyqaralyq yntymaqtastyq (GIZ) baǵdarlamasynyń jetekshisi doktor Karolına Mılovpen kezdesti.
Mınıstrliktiń baspasóz qyzmetiniń málimetinshe, kezdesý barysynda taraptar birlesken jobalardy odan ári júzege asyrý máselelerin talqylady. Sonyń ishinde GIZ uıymynyń «Qazgıdrogeologııa» ulttyq gıdrogeologııalyq qyzmeti» KEAQ-tyń Sıtýatsııalyq-taldaý ortalyǵyn jerasty sý resýrstaryn basqarýǵa arnalǵan zamanaýı jabdyqtarmen jáne arnaıy baǵdarlamalarmen qamtamasyz etýge qarjylaı qoldaý kórsetýi sóz boldy.
Sondaı-aq taraptar «Turaqty Ortalyq Azııa úshin Eýropalyq Odaq: sý, energetıka jáne klımattyń ózgerýi salalaryndaǵy birlesken is-qımyl jáne yntymaqtastyq» jobasy aıasyndaǵy yntymaqtastyqty keńeıtý múmkindikterin talqylady.
Budan bólek, Qyzylorda qalasynda júzege asyrylǵan «Sýdy únemde — bolashaqty saqta!» jobasynyń qorytyndylary qaraldy. Taraptar kelisimge kelgen jaǵdaıda, bul jobany 2027 jyldan bastap Qazaqstannyń ózge de ońtústik óńirlerinde iske asyrý josparlanyp otyr.
— Germanııa — Qazaqstannyń sý salasyndaǵy senimdi seriktesi. Jerasty sý resýrstaryn basqarýdan bastap, sý únemdeý mádenıetin qalyptastyrýǵa deıingi birlesken jobalar naqty nátıje berip keledi. Sondyqtan biz bul yntymaqtastyqty kezeń-kezeńimen keńeıtýge nıettimiz, — dedi Sý resýrstary jáne ırrıgatsııa vıtse-mınıstri Aslan Abdraımov.
GIZ ókilderi mınıstrlikke saraptamalyq jáne tehnıkalyq qoldaý kórsetýdi jalǵastyrýǵa daıyn ekenin rastady. Onyń ishinde sý resýrstaryn basseındik basqarý josparlaryn ázirleý jumystaryna qoldaý kórsetý máselesi de qamtyldy.
Budan buryn elimizdiń sý sharýashylyǵy salasynda 29 myńnan asa adam eńbek etetinin jazǵanbyz.
