Qazaqstan men Germanııa sý salasynda jańa hab qurýy múmkin
ASTANA. KAZINFORM — Qazaqstan men Germanııa tehnologııa almasý jáne pılottyq jobalardy damytýǵa arnalǵan birlesken sý habyn qurý máselesin pysyqtap jatyr.
Sý resýrstary jáne ırrıgatsııa mınıstri Nurjan Nurjigitov Germanııa Federatıvtik Respýblıkasynyń Qazaqstandaǵy Tótenshe jáne ókiletti elshisi Haıke Renate Paıchpen kezdesti. Taraptar sý salasyndaǵy yntymaqtastyqty odan ári damytý máselelerin talqylady. Atap aıtqanda, Qazaqstan-Germanııa sý habyn qurý máselesi qaraldy. Bul — tehnologııalar almasýǵa, tsıfrlyq sheshimderdi engizýge jáne pılottyq jobalardy damytýǵa arnalǵan platforma. Sý habyn qurý týraly usynys Berlınde ótken «Qazaqstan Respýblıkasy — Germanııa Federatıvtik Respýblıkasynyń sý salasyndaǵy strategııalyq áriptestigi: jańa deńgeı» taqyrybyndaǵy dóńgelek ústel barysynda tanystyrylǵan bolatyn.
Qazir Sý resýrstary jáne ırrıgatsııa mınıstrliginiń Sý resýrstarynyń aqparattyq-taldaý ortalyǵy hab tujyrymdamasynyń jobasyn ázirledi. Qujat sý salasyndaǵy 300-den astam kompanııany biriktiretin German Water Partnership (GWP) nemis qaýymdastyǵyna kelisý úshin joldandy.
Aıta keteıik, byltyr qazan aıynda QR Sý resýrstary jáne ırrıgatsııa mınıstrligi men GWP sý resýrstaryn basqarý salasyndaǵy strategııalyq áriptestik týraly kelisimge qol qoıǵan bolatyn.
— Sońǵy jyldary Qazaqstan men Germanııanyń sý salasyndaǵy ózara is-qımyly aıtarlyqtaı damyp, naqty praktıkalyq sıpatqa ıe boldy. Endigi qadam jekelegen bastamalar men pılottyq jobalardan júıeli ári uzaq merzimdi tehnologııalyq áriptestikke kóshý bolýy tıis. Birlesken sý habyn qurýdy Qazaqstan men Germanııanyń memlekettik organdary, bıznes ókilderi, ǵylymı jáne sarapshylyq qaýymdastyqtary ózara is-qımyl jasaıtyn, zamanaýı tehnologııalardy synaqtan ótkizip, birlesken jobalardy júzege asyratyn praktıkalyq alań qalyptastyrý retinde qarastyramyz, — dedi Sý resýrstary jáne ırrıgatsııa mınıstri.
Kezdesýde Nurjan Nurjigitov pen elshi sý resýrstaryn basqarý salasynda kadrlardy birlesip daıarlaý jáne ozyq tájirıbelermen almasý perspektıvalaryn da talqylady. Sonymen qatar taraptar Qazaqstannyń sý sharýashylyǵy ınfraqurylymyn jańǵyrtý jobalaryn iske asyrýǵa nemis tehnologııalaryn, ınjenerlik sheshimderi men sarapshylyq tájirıbesin tartý múmkindikterin qarastyrdy.
Budan buryn Prezıdent Qasym-Jomart Toqaevtyń Germanııa Federatıvtik Respýblıkasyna resmı sapary bastalǵanyn jazǵanbyz.
