Qazaqstan men Germanııa sý salasynda iri jobalardy birlesip júzege asyrmaq
ASTANA. KAZINFORM — Qazaqstan men Germanııa sý resýrstaryn tıimdi paıdalaný, sý ınfraqurylymyn jańǵyrtý jáne aýyl sharýashylyǵyna nemis tehnologııalaryn engizý baǵytynda yntymaqtastyqty keńeıtýdi kózdep otyr. Taraptar birlesken Qazaqstan-Germanııa sý habyn qurý máselesin de talqylady. Bul týraly vedomstvonyń baspasóz qyzmeti málim etti.
Sý resýrstary jáne ırrıgatsııa vıtse-mınıstri Jandos Sálimov Germanııa Federaldyq Azyq-túlik, aýyl sharýashylyǵy jáne óńirlik sáıkestik mınıstrliginiń (BMLEH) Parlamenttik memlekettik hatshysy Martına Englhardt-Kopf bastaǵan delegatsııamen kezdesti.
Taraptar aýyl sharýashylyǵynda sýdy paıdalaný tıimdiligin arttyrý baǵytynda Germanııanyń kásiporyndarymen jáne ǵylymı uıymdarymen yntymaqtastyq ornatý múmkindikterin qarastyrdy.
Sondaı-aq Qazaqstannyń sý sharýashylyǵy ınfraqurylymyn salý jáne rekonstrýktsııalaý jobalaryna nemis kompanııalarynyń qatysý múmkindigi, sý resýrstaryn basqarýdyń ozyq ádisterin engizý, mamandardy birlesip oqytý jáne qoldanystaǵy kadrlardyń biliktiligin arttyrý máseleleri qaraldy.
Budan bólek, taraptar tehnologııalar almasýǵa, tsıfrlyq sheshimderdi engizýge jáne birlesken pılottyq jobalardy damytýǵa arnalǵan Qazaqstan-Germanııa sý habyn qurý máselesin talqylady.
Qazirgi ýaqytta QR Sý resýrstary jáne ırrıgatsııa mınıstrliginiń Sý resýrstary jónindegi aqparattyq-taldaý ortalyǵy men German Water Partnership (GWP) uıymy sý salasyndaǵy 300-den astam kompanııany biriktiretin hab tujyrymdamasynyń jobasyn kelisip jatyr.
— Biz Germanııamen yntymaqtastyqty odan ári damytýǵa múddelimiz. Búgingi dıalog seriktestigimizdi nyǵaıtý jolyndaǵy mańyzdy qadam bolyp, sý resýrstary salasyndaǵy ózara tıimdi bastamalardy júzege asyrýǵa jańa múmkindikter ashady dep senemin. Memleket basshysy Qazaqstan halqyna Joldaýynda aýyl sharýashylyǵynda sýdy paıdalaný tıimdiligin arttyrý mindetin qoıdy. Nemis tehnologııalary men tájirıbesi osy mindetti iske asyrýdyń mańyzdy quraly bola alady, — dedi Sý resýrstary jáne ırrıgatsııa vıtse-mınıstri Jandos Sálimov.
Aıta keteıik, buǵan deıin Qazaqstanda 10 jylǵa sozylǵan on sý jobasynyń qurylysy qaıta bastalǵanyn jazǵan edik.
