Qazaqstan men Germanııa sý resýrstaryn basqarý boıynsha kelisimshart jasasty
Qazaqstannyń Sý resýrstary jáne ırrıgatsııa mınıstrligi men Halyqaralyq yntymaqtastyq jónindegi German qoǵamy (GIZ) «Ortalyq Azııadaǵy sý resýrstaryn klımattyq áserdi eskere otyryp basqarý» óńirlik baǵdarlamasyn iske asyrý týraly kelisimshart jasasty, dep habarlaıdy Kazinform.
Qujatqa mınıstr Nurjan Nurjigitov pen baǵdarlama menedjeri, doktor Karolına Mılov qol qoıdy.
GFR, Qazaqstan, Qyrǵyz Respýblıkasy, Ózbekstan, Tájikstan, Túrikmenstan qatysatyn baǵdarlama Germanııa federaldy úkimetiniń «Jasyl Ortalyq Azııa» aımaqtyq klımat jáne qaýipsizdik bastamasynyń bóligi sanalady. Onyń maqsaty - klımattyq áserdi eskere otyryp, óńirlik deńgeıde sý resýrstaryn ıntegratsııalanǵan basqarýdy engizý.
Baǵdarlama QR Sý resýrstary jáne ırrıgatsııa mınıstrligimen jáne «Amýdarııa» jáne «Syrdarııa» basseındik sý sharýashylyǵy uıymdarymen jumys isteıdi. Joba aıasynda óńirde sýdy paıdalanýdyń tıimdiligin arttyrý, klımattyq áserdi eskere otyryp, sý resýrstaryn basqarý jónindegi pılottyq jobalardy iske asyrý jáne Amýdarııa men Syrdarııa ózenderiniń basseınderin klımattyń ózgerýine beıimdeý jónindegi jumystar ázirlenedi.
Baǵdarlamany iske asyrýdyń operatsııalyq jospary bekitilip, sondaı-aq QR Sý resýrstary jáne ırrıgatsııa mınıstrligi men basqa da qatysýshylardy qamtıtyn úılestirý komıteti qurylady. Nemis tarapy sarapshylardy usynýǵa, jergilikti mamandardy bazalyq jáne qosymsha oqytýdy qamtamasyz etýge mindetteledi. Sonymen qatar GIZ qajetti jabdyqty jetkize alady jáne granttar túrinde qarjylyq qoldaý kórsete alady. Shart 2027 jyldyń aqpanyna deıin jaramdy.
«Bizdiń birlesken is-qımyldarymyz alǵa qoıylǵan maqsattarǵa qol jetkizýge jáne sý resýrstaryn basqarý máselesinde Ortalyq Azııa elderi arasyndaǵy kooperatsııany kúsheıtýge múmkindik beredi dep úmittenemin. Sýdy tıimdi jáne durys paıdalaný – óńirimizdiń aldynda turǵan basty máseleleriniń biri. Sondyqtan aldaǵy mindetterdi birlesip jáne nemis áriptesterimizdiń qoldaýymen sheshemiz», - dedi QR Sý resýrstary jáne ırrıgatsııa mınıstri Nurjan Nurjigitov.
