Qazaqstan men Germanııa Prezıdentteri kópjaqty yntymaqtastyqty nyǵaıta túsýge ýaǵdalasty
Memleket basshysy GFR Federaldyq Prezıdenti Frank-Valter Shtaınmaıermen kezdesti, dep habarlaıdy QazAqparat Aqordanyń resmı saıtyna silteme jasap.
Taraptar Germanııa Prezıdentiniń taıaýda Qazaqstanǵa jasaǵan sapary aıasynda qol jetkizilgen ýaǵdalastyqtardyń júzege asyrylý barysyn qarastyrdy.
Atap aıtqanda, energetıka, tranzıt, logıstıka, paıdaly qazbalardy ıgerý, jańartylatyn energııa kózderi, aýyl sharýashylyǵy jáne tsıfrlandyrý sekildi yntymaqtastyqtyń basym baǵyttaryna qatysty birlesken jumystardy talqylady.
Kelissóz barysynda mádenı-gýmanıtarlyq baılanystardy, sondaı-aq eki eldiń ǵylymı jáne bilim berý uıymdary arasyndaǵy qatynastardy nyǵaıtý máselesine basa mán berildi.
Qasym-Jomart Toqaev pen Frank-Valter Shtaınmaıer Qazaqstan men Germanııanyń kópjaqty yntymaqtastyǵyn odan ári nyǵaıtý úshin birlesken is-qımyldardy arttyra túsýge ýaǵdalasty.
Osyǵan deıin Frank-Valter Shtaınmaıerdiń Qasym-Jomart Toqaevty rezıdentsııasynda qarsy alǵanyn jazdyq.
Eske salsaq, keshe QR Prezıdenti Qasym-Jomart Toqaevtyń Germanııa Federatıvtik Respýblıkasyna resmı sapary bastaldy.
Prezıdent Germanııa Kantsleri Olaf Sholtstiń vedomstvosyna baryp, betpe-bet formatynda kelissóz júrgizdi.
Kelissózderden keıin tilshilerge bergen baspasóz máslıhatynda Prezıdent Qazaqstannyń Reseımen ekijaqty tarapta jáne tıisti ıntegratsııalyq birlestikter sheńberinde turaqty dostyq qarym-qatynasta ekenin aıtty. Ýkraınadaǵy jaǵdaıǵa qatysty Qazaqstannyń ustanymy jóninde pikir bildirdi. Ózara aıyptaýlardy toqtatyp, iskerlik kelissózder júrgizýge shaqyrdy.
Qazaqstan men Germanııanyń iri jáne orta bıznesteri arasynda mańyzdy kommertsııalyq kelisimder bekitildi.
Memleket basshysy Germanııanyń Federaldyq kantslerimen keńeıtilgen quramda kelissóz júrgizdi. Prezıdent júrgizilgen kelissózder qazaq-german qatynastaryn odan ári nyǵaıtýǵa eki taraptyń nıetti ekenin taǵy da rastaǵanyn atap ótti.
